पेट्रोलपंप टाकण्यासाठी वृद्धेकडून ४० लाख घेतले; दोन वर्षांत रुपयाही फेडला नाही; आता तिघांविरुद्ध गुन्हा!, छत्रपती संभाजीनगरची घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : भारत पेट्रोलियमकडून मंजूर झालेला पेट्रोलपंप सुरू करण्यासाठी दोन वर्षांपूर्वी वृद्धेकडून ४० लाख रुपये घेऊन त्यातील रुपयाचीही परतफेड न करणाऱ्या तिघांविरोधात अखेर सिटी चौक पोलिसांनी गुन्हा नोंदवला आहे. जकिया बेगम अब्दुल्ला खान (वय ६७) असे या प्रकरणात फसवणूक झालेल्या वृद्धेचे नाव आहे.

जकिया बेगम आणि संशयित मिर्झा यास्मिन बेगम मिर्झा बिस्मिल्ला, बिस्मिल्ला बेग कय्युम बेग (दोघेही रा. डिलक्स अपार्टमेंट) आणि आजमत बेग कय्युम बेग (रा. बारापुल्ला गेट) हे एकाच वसाहतीमध्ये राहतात. त्यांची आधीपासून ओळख आहे. काही वर्षांपूर्वी जकिया बेगम यांच्या पतीच्या नावे असलेली रावसपुरा येथील जमीन संशयितांना पेट्रोलपंप टाकण्यासाठी देण्यात आली होती. हा पेट्रोलपंप सुरू करण्यासाठी त्यांनी जकिया बेगम यांच्याकडून २०२३ मध्ये ५० लाख रुपये उधारीवर मागितले.

पेट्रोलपंप सुरू झाल्यानंतर अधिक रकमेचा परतावा देण्याचे आमिष त्यांनी दाखवले. यानंतर त्यांनी ९ नोव्हेंबर २०२३ रोजी यासीन मिर्झा बँक खात्यावर १५ लाखांची रक्कम जमा केली, तर दोन मुलींच्या बँक खात्यातून आणखी २५ लाख रुपये आरोपींना दिले. या ४० लाख रुपयांत संशयितांनी पेट्रोलपंप सुरू केला. मात्र, नंतर वारंवार मागणी करूनही आरोपी जकिया बेगम यांना पैसे परत देण्यास टाळाटाळ करू लागले. वारंवार पैसे परत मागूनही उडवाउडवीची उत्तरे देऊ लागल्याने अखेर जकिया बेगम यांनी सिटी चौक पोलीस ठाण्यात तक्रार नोंदवली. आता या प्रकरणी गुन्हा नोंदवून पोलिसांनी तपास सुरू केला आहे.