वृद्धेचा मृतदेह दुकानासमोर ठेवून कुटुंबीयांचा संताप!, मील कॉर्नर भागातील घटना 

छत्रपती संभाजीनगर (मेट्रोपोलिस पोस्ट वृत्तसेवा) : भाडेकरूशी असलेल्या वादामुळेच वृद्धेचा मृत्यू झाल्याचा आरोप करत वृद्धेच्या कुटुंबीयांनी मृतदेह भाडेकरूच्या दुकानासमोर तासभर ठेवला आणि ठिय्या मांडला. ते पोलिसांचेही ऐकत नव्हते. हा गुरुवारी (२५ डिसेंबर) घडला. सिटी चौक पोलिसांनी मृतदेहाची विटंबना व अवहेलना केल्याप्रकरणी १० जणांविरुद्ध गुन्हा दाखल केला आहे. हा प्रकार मिल कॉर्नर परिसरात घडला.

किरण राजू बोरसे, कपिल राजू बोरसे, श्याम राजू बोरसे, कृष्णा राजू बोरसे, स्वप्नील दीपक बोरसे, करण अरुण बोरसे, नितीन गुलाब लिंगायत, लखन वसंत लिंगायत, लखन अरुण बोरसे व सनी गणेश दळवी अशी गुन्हा दाखल झालेल्यांची नावे असून, हे सर्व वृद्धेचे नातेवाइक आहेत. पोलिसांच्या माहितीनुसार, मृतक शकुंतला बापूराव बोरसे यांच्या मालकीची मिल कॉर्नर परिसरात इमारत आहे. इमारतीत त्यांनी भारत मेडिकल चालकाला गाळा भाड्याने दिला होता. त्याला वारंवार गाळा सोडण्यास सांगूनही तो खाली करत नव्हता. यातून त्यांच्यात अनेकदा वाद झाले.

मात्र तरीही मेडिकलचालक ऐकत नव्हता. याच वादाचा धसका घेऊन शकुंतला यांचे निधन झाले. त्यानंतर कुटुंबीयांनी मृतदेह असलेली रुग्णवाहिका भारत मेडिकल नेत मृतदेह त्याच्या दुकानासमोर ठेवला. घटनास्‍थळी काही राजकीय पदाधिकारीदेखील आले. पोलीस निरीक्षक निर्मला परदेशी, सहायक पोलीस निरीक्षक मनोज शिंदे यांनी सहकाऱ्यांसह धाव घेतली. मात्र समजूत घालूनही वृद्धेचे कुटुंब ऐकत नव्हते. तासभर मृतदेह त्यांनी हलवला नाही. बेकायदेशीर जमाव जमवून मृतदेहाची विटंबना, अवहेलना केल्याप्रकरणी अखेर पोलिसांनी या कुटुंबीयांविरुद्ध गुन्हा दाखल केला. अधिक तपास सहायक पोलीस निरीक्षक सुधाकर मिसाळ करत आहेत.