छत्रपती संभाजीनगर (मेट्रोपोलिस पोस्ट वृत्तसेवा) : नारेगाव येथील एचपी गॅस कंपनीतून गॅस सिलिंडर भरलेला ट्रक चोरट्याने लंपास केल्याची घटना बुधवारी (२४ डिसेंबर) सकाळी समोर आली. हा ट्रक नंतर बीड बायपासवर आढळला. मात्र त्यातून ६२ गॅस सिलिंडर गायब होते. सिडको एमआयडीसी पोलिसांनी चोरट्याविरुद्ध गुन्हा दाखल केला आहे.
चालक सुंदर आसाराम मुंढे (वय ३८, रा. श्री अपूर्वम सोसायटी, पिसादेवी, छत्रपती संभाजीनगर) यांनी या प्रकरणात तक्रार दिली आहे. ते HPCL गॅस कंपनी नारेगाव येथे सोमनाथ बाळासाहेब ढाकणे यांच्या मालकीची ट्रक (MH 44 U 2309) चालवतात. मंगळवारी सायंकाळी पावणेसातला HPCL गॅस कंपनी नारेगाव येथून HP गॅसने भरलेल्या १४ किलो गॅसचे ३४० सिलिंडर व ५ किलो गॅसचे ४ सिलेंडर असे एकूण ३४४ सिलिंडर ट्रकमध्ये लोड करून ट्रक नारेगाव रोडवर टँकर पार्किंगसमोर उभा केला.
रात्री १० च्या सुमारास ट्रकचे दरवाजे बंद करून चावी गाडीमध्येच ठेवून ते घरी पिसादेवीला आले. त्यानंतर बुधवारी सकाळी सव्वा आठला गाडी खाली करायची असल्याने ते ट्रक उभा केलेल्या ठिकाणी आले असता ट्रक दिसला नाही. त्यांनी ट्रकचा शोध घेतला असता झाल्टा फाटा बीड बायपास येथे रोडच्या बाजूला उभा केलेला दिसला. गॅस सिलिंडर तपासले असता त्यामध्ये ६२ गॅस सिलिंडर कमी असल्याचे दिसून आले. १ लाख १४ हजार ७०० रुपयांचे ६२ गॅस सिलिंडर चोरट्याने लंपास केल्याचे तक्रारीत म्हटले आहे. अधिक तपास पोलीस अंमलदार सुभाष पवार करत आहेत.
.jpg)
.jpeg)
