पक्की टीप, पोलिसांची धाव, चिकलठाण्याच्या मिनी घाटीमागे सुरू झाली भागम्‌भाग!,२४ वर्षांच्या शुभमचे तोंड उघडणार? 

छत्रपती संभाजीनगर (मेट्रोपोलिस पोस्ट वृत्तसेवा) : पक्की खबर मिळाल्याने सिडको एमआयडीसी पोलीस ठाण्याच्या विशेष पथकाने चिकलठाण्याच्या मिनी घाटीमागील रोडवर २४ वर्षीय गांजा तस्कराच्या काही अंतरापर्यंत पाठलाग करून मुसक्या आवळल्या. त्याच्याकडून ८५ हजार रुपयांचा ४ किलो गांजा जप्त केला. ही कारवाई मंगळवारी (११ नोव्‍हेंबर) रात्री पावणेनऊच्या सुमारास करण्यात आली. तस्कराने गांजा विकत असल्याची कबुली दिली. पण गांजा कुठून आणला, कुणाला विकणार होता, हे रॅकेट कसे आणि कोण चालवते, हे पोलिसांनी वारंवार विचारूनही तोंड उघडलेले नाही. आता कसून चौकशीत त्याचे तोंड उघडण्याच्या तयारीत पोलीस आहेत.

विशेष पथकातील पोलीस अंमलदार संजय नंद यांनी या प्रकरणात तक्रार दिली आहे. विशेष पथकाचे प्रमुख सहायक पोलीस निरीक्षक भरत पाचोळे यांनी नंद यांच्यासह पोलीस अंमलदार संतोष सोनवणे, परशुराम सोनुने, प्रकाश सोनवणे, संतोष गायकवाड, रतन नागलोत व अरविंद पुरी यांना बोलावून घेतले. त्यांना सांगितले, की गुप्त बातमीदाराकडून माहिती मिळाली आहे की, शुभम साठे हा गुलाबी टी शर्ट घातलेला असून तो चिकलठाण्यातील जिल्हा सामान्य रुग्णालयाच्या (मिनी घाटी) मागील बाजूस चौधरी कॉलनीकडे जाणाऱ्या रोडवर नाल्यालगत गांजाची विक्री करण्यासाठी येणार आहे. त्यानंतर लगेचच विशेष पथक त्याला पकडण्यासाठी रवाना झाले.

रात्री पावणेनऊला पथक मिनी घाटीच्या मागील बाजूस चौधरी कॉलनीकडे जाणाऱ्या रोडवर पोहोचले. तिथे संशयित शुभम साठे दिसला. त्याच्या हातात पिवळी पिशवी होती. पोलिसांना पाहून तो पळू लागला. पोलीस अंमलदार संतोष गायकवाड व परशुराम सोनुने हे त्याचा काही अंतरापर्यंत पाठलाग करत असताना तो पडला. त्याचवेळी पोलिसांनी त्याला ताब्यात घेतले. त्याच्याकडील पिशवीत गांजा मिळून आला. गांजाचे वजन ४ किलो २१८ ग्रॅम भरले. विचारणा केली असता, त्याने सदर गांजा चा मालाबाबत काहीएक उपयुक्त माहीती दिली नाही. त्याने गांजा विकत असल्याची कबुली दिली. मात्र गांजा कुठून आणला, कुणाला देणार होता, हे अद्याप चौकशीत सांगितलेले नाही. पोलीस त्याची कसून चौकशी करत आहेत. अधिक तपास सहायक पोलीस निरीक्षक कैलास लहाने करत आहेत.