छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : न्यू हनुमाननगरातील सेंट्रींग कामगाराचा मुलगा शाळेत जातो असे सांगून घराबाहेर पडला. त्यानंतर त्याची स्कूल बॅग शेजारच्यांच्या घरासमोर आढळली. मुलगा बेपत्ता आहे. त्याचे अपहरण झाल्याची शक्यता असून, पुंडलिकनगर पोलीस शोध घेत आहेत. सोमवारी (२९ सप्टेंबर) सकाळी ही घटना घडली.
अपहृत १२ वर्षीय मुलगा हा रामचंद्र नाईक हायस्कूलमध्ये पाचवीत शिकतो. तो रोज सकाळी पावणेसातला शाळेत जातो. दुपारी १ ला घरी परत येतो. सोमवारी सकाळी साडेआठच्या सुमारास मुलाने शेजारच्या घरासमोर स्कूल बॅग ठेवल्याचे दिसून आले. त्याच्या वडिलांनी शाळेत जाऊन शिक्षकांना विचारले असता त्यांनी सांगितले की, तुमचा मुलगा आज शाळेतच आला नाही. त्यानंतर त्याच्या वडिलांनी शाळेचा परिसर, शेजारी, नातेवाइक, मुलाच्या मित्रांकडे व इतरत्र शोध घेतला. मात्र तो मिळून आला नाही. अखेर पोलिसांत धाव घेऊन अपहरणाची तक्रार करण्यात आली. अधिक तपास पोलीस अंमलदार लक्ष्मण राठोड करत आहेत.
यशवंतनगरातून मुलगी बेपत्ता...यशवंतनगरातून खासगी नोकरदाराच्या १६ वर्षीय भाचीचे सोमवारी (२९ सप्टेंबर) सकाळी अपहरण झाले असून, तिच्या मामाने पुंडलिकनगर पोलीस ठाण्यात तक्रार दिली आहे. त्यांची भाची एमजीएम संस्कार महाविद्यालयात ११ वीत शिकते. ती नेहमीप्रमाणे सकाळी पावणेनऊला शाळेत जाण्यासाठी घरातून जाते व दुपारी साडेतीनला परतते.
सोमवारी दुपारी चारला ती कॉलेजमधून घरी आली नाही. त्यामुळे मामाने कॉलेजला जाऊन बघितले असता ती दिसली नाही. तिच्या शिक्षकांना विचारले असता त्यांनी सांगितले की, आज ती कॉलेजमध्ये आली नाही. त्यानंतर मामाने कॉलेजच्या आजूबाजूचा परिसर, शेजारी, नातेवाईक, तिच्या मित्र-मैत्रिणीकडे व इतरत्र शोध घेतला परंतु मुलगी मिळून आली नाही. अखेर पोलिसांत अपहरणाची तक्रार करण्यात आली. अधिक तपास पोलीस उपनिरीक्षक अर्जुन राऊत करत आहेत.
