वाळूज एमआयडीसी परिसरातील कुंटणखान्यावर छापा, ४ महिलांची सुटका, आंटीला अटक

छत्रपती संभाजीनगर (मेट्रोपोलिस पोस्ट वृत्तसेवा) : वाळूज एमआयडीसी परिसरातील तिसगावजवळील खवड्या डोंगराजवळ पत्र्याच्या शेडमध्ये कुंटणखाना सुरू होता. एक ७० वर्षांची म्हातारी ४ महिलांकडून वेश्या व्यवसाय करवून घेत होती. पोलीस उपायुक्त पंकज अतुलकर यांच्या पथकाने छापा मारून महिलांची सुटका केली. कुंटणखाना चालवणारी म्हातारी आणि जागामालकाविरुद्ध गुन्हा दाखल केला आहे. ही कारवाई सोमवारी (२२ डिसेंबर) रात्री साडेसातच्या सुमारास करण्यात आली.

कुंटणखाना चालक कडूबाई भिकन पवार (वय ७०, रा. पंढरपूर, वाळूज एमआयडीसी परिसर, छत्रपती संभाजीनगर) आणि शेख फरिद सांडू (वय ५३, रा. एकतानगर पंढरपूर) अशी गुन्हा दाखल केलेल्यांची नावे आहेत. त्यांच्याविरुद्ध पोलीस अंमलदार सतीश फुसे यांनी तक्रार दिली. पोलीस उपायुक्त पंकज अतुलकर, सहायक पोलीस आयुक्त डॉ. भागिरथी पवार यांनी पोलीस उपनिरीक्षक वसंत शेळके, सहायक पोलीस उपनिरीक्षक शशिकांत सोनवणे, भास्कर गायकवाड, पोलीस अंमलदार सतीश फुसे, तडवी, महिला पोलीस अंमलदार प्रियांका रोडे यांना बोलावून घेतले आणि धुळे-सोलापूर हायवेलगत असलेल्या तिसगाव शिवारातील खवड्या डोंगर येथे एक महिला निळ्या पत्र्याच्या शेडमध्ये काही महिलांना डांबून कुंटणखाना चालवत असल्याचे सांगितले.

कारवाईच्या सूचना केल्या. त्यानंतर सहायक पोलीस आयुक्त डॉ. भागिरथी पवार यांनी सहकाऱ्यांसह खवड्या डोंगराकडे धाव घेतली. रात्री पावणेआठला बनावट ग्राहकाला कुंटणखान्याकडे पाठविण्यात आले. रात्री आठला बनावट ग्राहकाने दरवाजाबाहेर येऊन पोलीस पथकाला इशारा केला. त्यानंतर लगेचच पोलिसांनी पत्र्याच्या शेडमध्ये धाव घेतली. दरवाजात कडूबाई बसलेली होती. शेडमध्ये एकूण ४ खोल्या होत्या. समोरील बाजूच्या २ खोल्यांना कापडी पडदे लावलेले होते. पोलिसांनी खोलीतील सर्वांना बाहेर येण्यास सांगितले. एका खोलीतून पोलिसांनी पाठवलेला बनावट ग्राहक व एक महिला बाहेर आली. या वेळी बनावट ग्राहकाने सांगितले, की कडूबाईला संभोगासाठी महिलेची मागणी केली असता तिने ५०० रुपये लागतील, असे सांगितले. तिने आतल्या खोलीतून एका महिलेला बाहेर बोलावले व बनावट ग्राहकाकडून ५०० रुपये घेऊन त्या महिलेला त्याच्यासोबत खोलीत पाठवले होते.

ती ४० वर्षीय महिला वाळूज एमआयडीसीतीलच रहिवासी निघाली. तिने पोलिसांना सांगितले, की कडूबाई कुंटणखाना चालवत असून, तिने आम्हाला डांबून ठेवले आहे. ती ग्राहकाकडून ५०० रुपये घेते आणि आम्हाला केवळ २०० रुपये देते, असे तिने सांगितले. तिच्याशिवाय आणखी ३ पीडित महिला या ठिकाणी मिळून आल्या. त्यांच्याकडूनही कडूबाई वेश्या व्यवसाय करवून घेत होती. त्यातील एक ५० वर्षीय, दुसरी ४८ वर्षीय महिला या वाळूज एमआयडीसी परिसरातीलच रहिवासी निघाल्या, तर आणखी एक ५५ वर्षीय महिला ही मुकुंदवाडी भागातील निघाली. या कुंटणखान्यातून पोलिसांनी कंडोमची पाकिटे आणि ३२५० रुपये जप्त केले. दोन्ही खोल्यांमध्ये जमिनीवर गाद्या टाकलेल्या होत्या. बाजूला प्लास्टिक कॅरीबॅगमध्ये वापरलेले कंडोम मिळून आले होते. त्यात दुर्गंधी येत असल्यामुळे पोलिसांनी जप्त केले नाहीत. कडूबाईने ही जागा शेख फरिद याच्या मालकीची असल्याचे सांगितले. भागीदारीत कुंटणखाना चालवत असल्याचे सांगितले.