मी कांचा.. मी डॉन आहे... दुचाकी चोरी केल्यानंतर पकडला गेल्यावर धमकावले, दुचाकीमालकासह दोघांवर केला प्राणघातक हल्ला!, विश्रांतीनगरातील खळबळजनक घटना

छत्रपती संभाजीनगर (मेट्रोपोलिस पोस्ट वृत्तसेवा) : मुकुंदवाडी, पुंडलिकनगर पोलीस ठाण्यांच्या हद्दीत गुंडाराज सुरूच आहे. आता तर हद्दच झाली. एका गुंडाने दुचाकी चोरून गॅरेजवर आणली. दुचाकी शोधत तिथे दुचाकीमालक आणि त्याचा घरमालक असे दोघे पोहोचले असता गुंडाने साथीदारासह मिळून त्यांच्यावर प्राणघातक हल्ला केला. लोक जमल्याने गुंड आणि त्याचा साथीदार पळून गेले. ही घटना सोमवारी (१६ डिसेंबर) सकाळी पुंडलिकनगर पोलीस ठाण्याच्या हद्दीतील विश्रांतीनगरात घडली. पोलिसांनी कांचा नावाच्या गुंडासह त्याच्या साथीदाराविरुद्ध गुन्हा दाखल केला आहे.

अमोल अशोक रूडे (वय ३९, रा. बंबाटनगर) यांनी या प्रकरणात तक्रार दिली आहे. ते सिक्युरीटी गार्ड म्हणून काम करतात. त्यांच्या घरात किरायाने प्रकाश दीपा चव्हाण राहतात. सोमवारी (१६ डिसेंबर) सकाळी ८ च्या सुमारास ते रात्रपाळीची ड्युटी करून घरी आले. गल्लीतील लोकांनी सांगितले, की रात्री चोर आले होते. त्यांनी प्रकाश चव्हाण यांची मोटारसायकल चोरून नेली. त्यामुळे रूडे आणि प्रकाश चव्हाण हे मोटारसायकलचा शोध घेत पायी मुकुंदवाडी रेल्वे स्टेशनकडे जात असताना विश्रांतीनगर येथील गॅरेजवर प्रकाश चव्हाण यांची मोटारसायकल (MH20 DA3398) उभी दिसली.

मोटारसायकलजवळ विश्रांतीनगर येथील रीतेश कुऱ्हाडे उर्फ कांचा व एक अनोळखी तरुण उभे होते. रूडे यांनी मोटारसायकलजवळ जाऊन त्याला ही मोटारसायकल कोणी आणली, असे विचारले. प्रकाश यांनी ही माझी मोटारसायकल आहे, असे सांगितले असता रितेश व अनोळखी मुलाने प्रकाश चव्हाण यांची कॉलर धरून मी कांचा आहे, मी डॉन आहे, असे धमकावले. ते मोटारसायकल घेऊन तिथून जात असताना रूडे यांनी त्यांना रोखले असता कांचा व त्याच्या साथीदाराने प्रकाश चव्हाण यांच्या पोटात बुक्क्या मारल्या. रूडे यांच्यावर स्‍क्रू ड्रायव्हरने वार केले. यात रूडे जखमी झाले. तेथे लोक जमा झाल्याने कांचा व त्याचा साथीदार मुकुंदवाडी रेल्वे स्टेशनकडे पळून गेले. अधिक तपास पोलीस उपनिरीक्षक शिवप्रसाद कऱ्हाळे करत आहेत.