छत्रपती संभाजीनगर (मेट्रोपोलिस पोस्ट वृत्तसेवा) : तोतया आयएएस अधिकारी कल्पना त्र्यंबकराव भागवत (वय ४५, रा. चिनारगार्डन, पडेगाव, छत्रपती संभाजीनगर) हिला बेस्ट आयएएस म्हणून प्रशस्तीपत्र देणारे राष्ट्रसंत तुकडोजी महाराज नागपूर विद्यापीठाचे माजी कुलगुरू तथा माजी उच्च शिक्षण संचालक डॉ. शहाबुद्दीन नसिरुद्दीन पठाण यांचीही चौकशी मंगळवारी (२ डिसेंबर) सायंकाळी सिडको पोलिसांनी केली. त्यांनाही १ लाख रुपयांनी कल्पनाने चुना लावल्याचे समोर आले. पुण्यातील एका कार्यक्रमात कल्पनाची आणि त्यांची भेट झाली होती. पहिल्याच भेटीत तिने त्यांना आयएएस असल्याचे सांगितले होते. विविध ओळखी असल्याचे सांगितल्याने त्यांचा विश्वास बसला होता. त्यावरूनच एका कार्यक्रमात त्यांनी तिला प्रशस्तीपत्र दिले होते, असे चौकशीतून समोर आले.
कल्पनासह तिचा अफगाणी प्रियकर मोहम्मद अशरफ गिल (वय २४, ह. मु. जंगपुरा, नवी दिल्ली) व केंद्रीय गृहमंत्र्यांच्या ओएसडींच्या नावाचा वापर करणारा तोतया अधिकारी डिम्पी देवेंद्रकुमार हरजाई (वय ३०, रा. पालम, दिल्ली) यांची सध्या पोलीस कोठडीत कसून चौकशी सुरू आहे. ते संपर्कात कसे आले, किती वेळा आणि कुठे कुठे भेटले याची माहिती घेतली जात आहे. कल्पनाच्या संपर्कातील २८ जणांना आतापर्यंत पोलिसांनी चौकशीसाठी हजर होण्याच्या नोटिसा बजावल्या आहेत. कल्पनाने २५ हजार रुपये भाडे असलेले अलिशान घर राहण्यास घेतले होते. मात्र आयएएस असल्याचे सांगून तिथे भाडे थकवल्याने कंटाळून घरमालकाने घर खाली करून घेतले. या घरमालकाचा जबाब पोलिसांनी नोंदवला.
कन्येच्या विवाहामुळे सुटीवर असलेले शहर पोलीस आयुक्त प्रवीण पवार सोमवारी (१ डिसेंबर) कामावर रूजू झाले. त्यांनी मंगळवारी सिडको पोलिसांकडून या गुन्ह्याच्या तपासाचा आढावा घेतला. तपासाच्या अनुषंगाने सूचना केल्या. सध्या पोलीस निरीक्षक अतुल येरमे, सहायक पोलीस निरीक्षक योगेश गायकवाड हे गुन्ह्याचा तपास करत आहेत, त्यांच्या मदतीला गुन्हे शाखेचे वरिष्ठ पोलीस निरीक्षक गजानन कल्याणकर आणि सायबर पोलीस ठाण्याचे सोमनाथ जाधव यांनाही देण्यात आले आहे. त्यांनीही सिडको पोलीस ठाण्यात जाऊन तिघांची कसून चौकशी केली. अशरफच्या मोबाइलमधून काही हाती लागते का, यासाठी सायबर तज्ज्ञ आणि फॉरेन्सीक विभाग प्रयत्नरत आहे.
कल्पनाच्या खात्यात कुणाकडून किती आले पैसे...१ जानेवारी ते २१ नोव्हेंबर २०२५ या कालावधीत कल्पनाच्या खात्यावर ३२ लाख ६८ हजार ८६२ रुपये आले. त्यात अशरफने याने २ लाख ३१ हजार २०० रुपये, सुंदर हरि ऊर्फ सुरेश जैन व अभिजित क्षीरसागर यांनी प्रत्येकी दीड लाख, दत्तात्रय शेटे ७ लाख ८५ हजार, रमेश मुळे २ लाख २५ हजार ५०० रुपये, सुधाकर जाधव १ लाख १८ हजार रुपये, नागेश आष्टीकर १ लाख ४५ हजार रुपये आणि समाधान बहादुरे ९७ हजार ५०० रुपये पाठवल्याचे समोर आले आहे. हे सर्वजण नोटिसा बजावूही अद्याप समोर आलेले नाहीत, तर कल्पनानेही आता तपासात सहकार्य करणे सोडून दिल्याने या प्रकरणाच्या चौकशीसाठी कठोर पवित्रा हाती घेण्याची गरज निर्माण झाली आहे.
.jpg)
