चिकलठाण्यातून १६ वर्षीय मुलाचे अपहरण

छत्रपती संभाजीनगर (मेट्रोपोलिस पोस्ट वृत्तसेवा) : चिकलठाण्यातून १६ वर्षीय मुलाचे अपहरण झाल्याची घटना शुक्रवारी (२१ नोव्‍हेंबर) दुपारी घडली. सिडको एमआयडीसी पोलीस ठाण्यात मुलाच्या आईने तक्रार दिली आहे. त्यावरून पोलिसांनी अपहरणाचा गुन्हा दाखल करून शोध सुरू केला आहे.

मूळचे उत्तरप्रदेशातील दाम्‍पत्‍य सध्या चिकलठाण्यात राहते. त्यांना दोन   मुले आहेत. पती-पत्‍नी दोघेही खासगी नोकरी करतात. शुक्रवारी (२१ नोव्‍हेंबर) सकाळी ७ ला महिला नेहमीप्रमाणे कंपनीत कामाला गेली. लहान मुलगा शाळेत गेला होता, तर मोठा मुलगा तब्येत बरी नसल्याने घरीच होता. कामावरून संध्याकाळी साडेपाचला महिला घरी आली असता लहान मुलगा घरी होता. महिलेने भय्या कुठे गेला, असे विचारले असता त्याने सांगितले, की भय्या दुपारी दोनला ट्युशनला जातो, असे सांगून गेला आहे.

त्यानंतर महिलेने घरातील कामे आवरली. संध्याकाळी साडेसहाला मोठा मुलगा ट्युशनमधून येतो. मात्र संध्याकाळचे सात वाजले तरी तो न आल्याने महिलेने त्याच्या ट्युशन क्लासला जाऊन पाहिले असता ट्युशनच्या शिक्षिकेने तो आज ट्युशनलाच आला नव्हता, असे सांगितले. त्यामुळे हादरलेल्या महिलेने आजूबाजूला मित्र, नातेवाइकांकडे जाऊन चौकशी केली. मात्र त्यांच्याकडेही तो मिळून आला नाही. त्याचे कोणीतरी अपहरण केल्याची शक्यता महिलेने पोलिसांकडे व्यक्त केली आहे. अधिक तपास पोलीस उपनिरीक्षक लखनसिंग पाचलोरे करत आहेत.