Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : अपघात झाल्यानंतर रिक्षातून जखमीला घाटी रुग्णालयात नेण्यात आले. जखमीची अपघातग्रस्त दुचाकी नंतर चोरट्याने गायब केली. त्याचा पडलेला मोबाइलही चोरून नेल्याची घटना सेव्हन हिल उड्डाणपुलाजवळ घडली आहे. जवाहरनगर पोलिसांनी मंगळवारी (२ डिसेंबर) चोरट्याविरुद्ध गुन्हा दाखल केला आहे.
सविता राजू गायकवाड (वय ४५, रा. भिमनगर जुना भावसिंगपुरा) यांनी याप्रकरणात तक्रार दिली आहे. त्यांच्या मुलासाठी त्यांनी मुलगा रोहितसाठी २०२३ मध्ये मोटारसायकल (MH 20 HC 7589) घेतली होती. शुक्रवारी (२८ नोव्हेंबर) रात्री पावणेबाराच्या सुमारास रोहित व त्याचा मित्र चंद्रकांत अंकुश काकडे (वय २१, रा. भीमनगर जुना भावसिंगपुरा) हे मोटारसायकलीने चंद्रकांतचा मामा शिवदिप तारक यांना आणण्यासाठी सेव्हन हिल उड्डाणपुलावरून जात असताना अचानक चंद्रकांतकडून मोटारसायकल घसरली आणि रोहित व चंद्रकांत पडले.
रोहितचा मोबाइल त्या ठिकाणी ठिकाणी पडला. चंद्रकांतने रोहितला रिक्षातून घाटी रुग्णालयात दाखल केले. शनिवारी (२९ नोव्हेंबर) सायंकाळी पाचला रोहित आणि चंद्रकांतने अपघातस्थळी जाऊन पाहिले असता मोटारसायकल मिळून आली नाही. ५० हजारांची मोटारसायकल व ३ हजारांचा मोबाइल कुणीतरी चोरून नेल्याची तक्रार सविता गायकवाड यांनी जवाहरनगर पोलीस ठाण्यात केली आहे. अधिक तपास पोलीस अंमलदार हिरा आघाडे करत आहेत.
.jpg)
