६ महिन्यांची गरोदर असूनही पैशांच्या हव्यासापोटी सासरच्यांकडून टोकाचा जाच!; सिलिंग फॅनला साडीने गळफास घेऊन २७ वर्षीय विवाहितेची आत्‍महत्‍या, वाळूज MIDC तील धक्कादायक घटना

छत्रपती संभाजीनगर (मेट्रोपोलिस पोस्ट वृत्तसेवा) : पती व सासरच्यांनी केलेल्या शारीरिक व मानसिक छळाला कंटाळून २७ वर्षीय विवाहितेने राहत्‍या घरात गळफास घेऊन आत्‍महत्‍या केली. ही घटना वाळूज एमआयडीसीतील वडगाव कोल्हाटीत गट नंबर येथे मंगळवारी (१३ जानेवारी) सकाळी समोर आली. विवाहितेच्या आईने दिलेल्या तक्रारीवरून वाळूज एमआयडीसी पोलिसांनी पतीसह सासरच्यांविरुद्ध आत्‍महत्‍येस प्रवृत्त केल्याचा गुन्हा दाखल केला आहे. सासरच्यांवर आरोप करत त्यांच्याविरुद्ध कठोर कारवाईसाठी विवाहितेच्या नातेवाइकांनी पोलीस ठाण्यात गर्दी केली होती.

पल्लवी मदन जगताप असे आत्‍महत्‍या केलेल्या विवाहितेचे नाव आहे. तिचा दुसरा पती गोपाल सहाने, नणंदा कविता चिकटे व अर्चना जाधव, नंदोई किशोर जाधव, समाधान चिकटे अशी गुन्हा दाखल केलेल्यांची नावे आहेत. पल्लवीची आई गोदावरी परमेश्वर घोपटे यांनी तक्रारीत म्हटले आहे, की पल्लवीचा पहिला विवाह २०१५ साली झाला होता. तिला सहा वर्षांची मुलगी आहे. पहिल्या पतीचा २०२१ मध्ये अपघाती मृत्यू झाला. त्यानंतर पालकांनी तिचा दुसरा विवाह १२ जुलै २०२४ रोजी गोपाल सहाने (रा. स्वस्तिक सिटी, वडगाव कोल्हाटी) याच्याशी करून दिला. लग्नात तीन लाख रुपये रोख व पाच ग्रॅम सोन्याची अंगठी देण्यात आली.

सप्टेंबर २०२४ मध्ये पहिल्या पतीच्या अपघाती मृत्यूच्या विम्याचे ८० लाख रुपये पल्लवीला मिळाल्याचे कळताच दुसरा पती गोपालने पैशांची मागणी सुरू केली. पल्लवीच्या खात्यातून ३० ते ३५ लाख रुपये काढण्यात आले. नणंद सीमाच्या लग्नासाठी २० लाखांची मागणी होती. नकार दिल्यानंतर पल्लवीचा छळ करून तिला १० लाख रुपये देण्यास भाग पाडले. नणंद अर्चना जाधव व तिचा पती किशोर जाधव यांच्या घरबांधणीसाठीही २० लाख रुपयांची मागणी करण्यात आली. छळ करून पल्लवीकडून ही रक्कम घेतली, असे तक्रारीत म्हटले आहे.

पैशांच्या हव्यासापायी वारंवार होणाऱ्या छळाला कंटाळून पल्लवीने मंगळवारी सकाळी ८ च्या सुमारास घरात सिलिंग फॅनला साडीच्या साह्याने गळफास घेतला. तिला परमेश्वर घोपटे व कृष्णलाल ठोंबरे यांनी घाटी रुग्णालयात दाखल केले असता डॉक्टरांनी तपासून मृत घोषित केले. सुरुवातीला पोलिसांनी आकस्मिक मृत्यूची नोंद केली होती. मात्र तिच्या आईने छळाची तक्रार केल्यानंतर पती व सासरच्या मंडळीविरुद्ध गुन्हा दाखल करण्यात आला. पल्लवी सहा महिल्यांची गरोदर होती. अधिक तपास पोलीस अंमलदार टी. के. शिंदे करत आहेत.