इन्स्टाग्रामवर फेक अकाऊंट तयार करून २२ वर्षीय तरुणीला त्रास द्यायचा, पोलिसांनी आवळल्या मुसक्या!, छत्रपती संभाजीनगरमधील प्रकार

छत्रपती संभाजीनगर (मेट्रोपोलिस पोस्ट वृत्तसेवा) : २२ वर्षीय तरुणीला इन्स्टाग्रामवर सतत मेसेज करून अश्लील शिवीगाळ, धमक्या देणाऱ्या माथेफिरू तरुणाला छत्रपती संभाजीनगर सायबर पोलिसांनी अटक केली आहे. मोहम्मद उजैब मोहम्मद अझहर (रा. गरम पाणी, छत्रपती संभाजीनगर) असे या माथेफिरूचे नाव आहे.

तक्रारदार तरुणी खासगी नोकरी करते. तिच्या इन्स्टाग्राम खात्यावर झारा खान नावाच्या आयडीवरून नोव्हेंबर २०२५ पासून वारंवार अश्लील मेसेज येत होते. समोरील व्यक्ती शिवीगाळ करत होती. धमक्या देत होती. त्यामुळे तरुणी त्रस्त झाली होती. तिने इन्स्टाग्रामवर त्याला ब्लॉक केले तरी तो वेगवेगळ्या मार्गाने संपर्क करून त्रास देतच होता. अखेर तरुणीने छत्रपती संभाजीनगर सायबर पोलीस ठाण्यात तक्रार दिली. त्यावरून पोलिसांनी तांत्रिक तपास केला. इन्स्टाग्राम आयडी मोहम्मद उजैबने तयार केल्याचे निष्पन्न झाले. सोशल मीडियाचा गैरवापर करून त्याने तरुणीची बदनामी करण्याचा आणि पाठलाग करून त्रास दिल्याचेही तपासात समोर आले.

त्याच्याविरुद्ध जिन्सी पोलीस ठाण्यात गुन्हा दाखल करून तातडीने मुसक्या आवळल्या आहेत. अधिक तपास जिन्सी पोलीस करत आहेत. ही कारवाई वरिष्ठांच्या मार्गदर्शनाखाली सायबर पोलीस ठाण्याचे पोलीस निरीक्षक सोमनाथ जाधव, पोलीस उपनिरीक्षक गणेश गिरी, पोलीस अंमलदार राहुल काळे, अमोल सोनटक्के, संदीप पाटील, महिला पोलीस अंमलदार हर्षा मेहता यांनी केली. सोशल मीडियाच्या माध्यमातून महिलांचा छळ, धमकी अथवा बदनामी करणाऱ्यांवर कडक कायदेशीर कारवाई करण्यात येणार असल्याचा इशारा पोलिसांकडून देण्यात आला आहे.