गायी कापून पिकअपमध्ये मांस घेऊन छ. संभाजीनगरला येताना गोरक्षकांनी पकडले!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : गायी कापून पिकअपमध्ये मांस घेऊन येणाऱ्या दोघांना आज, १७ सप्‍टेंबरला गोरक्षकांनी वाळूजला पकडले. वाहन आणि दोघांना वाळूज पोलीस ठाण्यात आणले. पोलिसांनी दोघांना ताब्‍यात घेत गुन्हा दाखल केला आहे.

वसीम अय्युम कुरेशी व अली जलाल कुरेशी (दोघे रा. ममदापूर ता. राहता जि. अहिल्यानगर) अशी संशयितांची नावे आहेत. त्‍यांच्याविरुद्ध पोलीस अंमलदार स्वप्नील खाकरे यांनी तक्रार दिली आहे. गोरक्षक नयना राजपूत व त्यांचे सहकारी पिकअप वाहन (MH12 MV1506) वाळूज पोलीस ठाण्यात घेऊन आले. या वाहनात गोमांस असल्याचे त्यांनी सांगितले. त्यावर पोलीस उपनिरीक्षक रमेश राठोड यांनी वाहनाची पाहणी केली असता कापलेल्या अवशेषांवरून जनावर हे गाय असल्याचे निदर्शनास आले.

गाईचे ओळखू येण्यात इतपत अवयव स्पष्ट दिसून येत होते. पोलिसांनी चालक वसीम व त्‍याच्यासोबतच्या अलीकडे चौकशी केली असता त्‍यांनी कबूल केले, की आम्‍ही ममदाबाद येथे गायी कापून त्याचे मांस वाहनात भरून ते विक्रीसाठी छत्रपती संभाजीनगरला जात होतो, तेव्हा गोरक्षकांनी आम्हाला पकडले. दोघांकडेही वाहतुकीचा कोणताही परवाना नव्हता. राठोड यांनी पंचनामा करून २ लाख रुपयांचे वाहन व २ लाख रुपयांचे मांस जप्त केले. वसीम व अलीविरुद्ध गुन्हा दाखल केला आहे. अधिक तपास पोलीस उपनिरीक्षक रमेश राठोड करत आहेत.