दोन्ही मातब्बर राजकीय नेते : माजी जिल्हा परिषद सदस्याने भाजप पदाधिकाऱ्याच्या घरात घुसून केला राडा, शहानूरवाडीतील धक्कादायक घटना

छत्रपती संभाजीनगर (मेट्रोपोलिस पोस्ट वृत्तसेवा) : प्रस्थापित राजकीय घराण्याशी संबंधित, जालना जिल्हा परिषदेचे माजी सदस्य श्यामसुंदर वसंतराव उढाण (वय ४७, रा. गुरुसहानीनगर, सिडको एन-४) यांनी चाकूने भाजप पदाधिकारी सतीश जगन्नाथराव घाटगे (वय ५२) यांच्या घरात घुसून बुधवारी (७ जानेवारी) पहाटे राडा केला. शहानूरवाडीच्या केशवनगरीत ही घटना घडली. चाकूने धमकावत सामानाची नासधूस करत कारची तोडफोड केल्याचे घाटगे यांनी तक्रारीत म्हटले आहे. त्यावरून जवाहरनगर पोलिसांनी उढाण यांच्याविरुद्ध गुन्हा दाखल केला आहे.

वैयक्तिक वादातून हा राडा केल्याचे समोर येत असून, घाटगे व उढाण एकमेकांचे नातेवाइक आहेत. दोघांनाही मोठी राजकीय व व्यावसायिक पार्श्वभूमी आहे. तक्रारीनुसार, सतीश घाटगे हे केशवनगरीत कुटुंबीयांसह राहतात. मंगळवारी (६ जानेवारी) मध्यरात्रीनंतर दीडच्या सुमारास अचानक सेंट्रल लॉक तोडून श्यामसुंदर उढाण हे घाटगे यांच्या घरात शिरले. सामानाची तोडफोड करू लागले. जोरजोरात शिवीगाळ करत होते. हातात चाकू घेऊन सर्वांना धमकावत होते. त्यामुळे घाटगे यांनी बेडरूममधून बाहेर न येता पोलिसांना कळवले.

जवाहरनगर पोलीस आले तरी उढाण हे घरातील साहित्याची तोडफोड करत होते. कारच्या काचाही त्यांनी फोडल्या. उढाण नशेत होते, असा तक्रारीत घाटगे यांनी म्हटले आहे. पोलिसांनी त्यांना ताब्यात घेऊन पोलीस ठाण्यात नेले. विशेष म्हणजे, या प्रकरणात पोलीस पुढील कारवाई करत असतानाच ते पहाटे पोलीस ठाण्यातून गायब झाले. घाटगे यांच्या तक्रारीवरून उढाण यांच्याविरुद्ध गुन्हा दाखल केला आहे.

कोण आहेत घाटगे, उढाण?
घाटगे हे घृष्णेश्वर साखर कारखाना व घनसावंगी येथील समृद्धी साखर कारखान्याचे चेअरमन असून, २०२४ मध्ये त्यांनी बंडखोरी करून विधानसभा निवडणूक लढवली होती. त्यात पराभव झाल्यानंतर पुन्हा भाजपमध्ये सक्रिय झाले. एका आमदाराचे नातलग असलेले श्यामसुंदर उढाण हे जालना जिल्हा परिषदेचे माजी सदस्य आहेत. त्यांच्या पत्नीने जिल्हा परिषद अध्यक्षपदही भूषवले आहे.