छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : शहरात टवाळखोरांनी सध्या उच्छाद मांडला असून, ऐन नवरात्रात घडलेल्या घटनेने त्यावर कळस चढवला आहे. या टवाळखोरांची धिंड काढून मिरवले तरच दहशत निर्माण होईल, अशा भावना व्यक्त होत आहेत. मध्यवर्ती बसस्थानकावर टवाळखोराने आधी एका महिलेची छेड काढत मारहाण केली. ही महिला तिथल्या पोलीस चौकीत धावली असता पोलीस तिला घेऊन टवाळखोराकडे आले. तेव्हा टवाळखोराने चक्क पोलीस अंमलदार शेख अर्शद शेख इकबाल यांना खाली पाडून बेदम मारहाण केली. हा धक्कादायक प्रकार बुधवारी (२४ सप्टेंबर) रात्री साडेनऊच्या सुमारास घडला.
मोहम्मद अशपाक उर्फ बब्बा पिता मोहम्मद हनिफ (वय २६, रा. पडेगाव, छत्रपती संभाजीनगर) असे या टवाळखोराचे नाव आहे. शेख अर्शद हे मध्यवर्ती बसस्थानकातील पोलीस चौकीचे अंमलदार आहेत. बुधवारी रात्री साडेनऊला ते महिला पोलीस अंमलदार सुषमा चांदेकर यांच्यासोबत कर्तव्यावर होते. पोलीस चौकीत असताना एक महिला त्यांच्याकडे आली. ती म्हणाली, की माझ्या ओळखीचा मोहम्मद अशपाक ऊर्फ बब्बा पिता मोहम्मद हनिफ (वय २६, रा. पडेगाव, छत्रपती संभाजीनगर) हा शिवीगाळ करून हाताचापटाने मारहाण करत आहे. स्वतःचे नाव जयश्री भगवान जाधव असल्याचे तिने सांगितले.
जयश्रीने मोहम्मद अशपाक हा बसस्थानकाच्या गेटवर थांबलेला असल्याचे सांगितले. त्यामुळे शेख अर्शद व सुषमा चांदेकर हे महिलेसोबत बसस्थानकासमोरील गेटजवळ गेले असता तेथे दोन जण बसलेले होते. त्यावेळी जयश्री हीने एका व्यक्तीकडे बोट करून सांगितले की, हा मोहम्मद अशपाक असून यानेच मला शिवीगाळ व मारहाण केलेली आहे. त्यावर शेख अर्शद यांनी त्याला तू महिलेस का मारहाण करत आहेस?, अशी विचारणा केली. त्यावर मोहम्मद अशपाक म्हणाला की, तू कोण आहेस, तुला काय करायचे? त्यावर शेख अर्शद यांनी त्याला तू इथे थांबू नकोस, बसस्थानकाबाहेर निघून घरी जा, असे सुनावले. त्यावर मोहम्मद अशपाक चक्क अर्शद यांच्या अंगावर धावून आला. त्यांची गणवेशाची कॉलर पकडून धक्का देत खाली पाडले व हाताचापटाने मारहाण करू लागला.
अर्शद हे त्याला विरोध करत असताना तो झटापट करू लागला. झटापटीत त्याने गणवेशाचे शर्टचे वरच्या बाजूचे बटन तोडले. त्याने अर्शद यांच्या तोंडावर ठोसा मारला. त्यामुळे त्यांचा चष्मा तुटला. त्याने जीवे मारण्याची धमकी देत शिवीगाळ केली. रस्त्यावर खाली पडलेला दगड उचलून त्यांना मारण्यासाठी धावला. सुषमा चांदेकर यांनी त्याला पकडून धरले. नंतर दोघांनी मिळून त्याला खासगी वाहनाने क्रांतीचौक पोलीस ठाण्यात आणले. त्यानंतर पोलिसांनी त्याचा यथेच्छ पाहुणचार केला. त्याच्याविरुद्ध गुन्हे दाखल केले आहेत. अधिक तपास सहायक पोलीस उपनिरीक्षक उत्तमराव जाधव करत आहेत.
