छत्रपती संभाजीनगर शहरातून २ अल्पवयीन मुलींचे अपहरण, कमळापूर, रेल्वेस्टेशनजवळील घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) :  वाळूज एमआयडीसीतील कमळापूर आणि छत्रपती संभाजीनगर रेल्वेस्टेशनवरून  अल्पवयीन मुलींचे अपहरण झाल्याच्या घटना समोर आल्या आहेत. मुलींच्या पालकांनी पोलिसांत तक्रारी दिल्यानंतर अपहरणकर्त्याविरुद्ध गुन्हा दाखल करण्यात आला आहे.

बिडकीन (ता. पैठण) येथील १७ वर्षीय मुलगी दिवाळीनिमित्त आत्याच्या घरी सेलूला गेलेली होती. ती शनिवारी (२५ ऑक्‍टोबर) सकाळी पावणेदहाच्या सुमारास जनशताब्दी एक्स्प्रेसने आत्याच्या मुलासोबत छत्रपती संभाजीनगरला आली. आत्याचा मुलगा ड्युटी असल्याने ऑटोने वाळूजला निघून गेला. मुलीने माझे मी जाते, तू जा, असे त्याला सांगितले होते. आत्याचा मुलगा गेल्यानंतर मुलगी रेल्वेस्टेशनवरूनच बेपत्ता झाली. रात्रीपर्यंत वाट पाहून अखेर कुटुंबीयांनी शोध सुरू केला. रेल्वेस्टेशन परिसरात शोध घेतला. मात्र ती मिळून आली नाही.

अखेर वेदांतनगर पोलीस ठाण्यात अपहरणाची तक्रार मुलीच्या आईने नोंदवली. तिला कुणीतरी फूस लावून पळवल्याचे तक्रारीत म्हटले आहे. अधिक तपास पोलीस उपनिरीक्षक संगिता गिरी करत आहेत. दुसऱ्या घटनेत वाळूज एमआयडीसीतील कमळापूर येथून १४ वर्षीय मुलीचे अपहरण झाले. सोमवारी (२७ ऑक्‍टोबर) दुपारी अडीचच्या सुमारास ती राहत्‍या घरातून कुणाला काही न सांगता निघून गेली. बराच वेळ झाला तरी मुलगी घरी न आल्याने तिच्या आईने शोध घेतला. मात्र ती मिळून आली नाही. अखेर वाळूज एमआयडीसी पोलीस ठाण्यात तक्रार करण्यात आली. अधिक तपास पोलीस उपनिरीक्षक विनोद आबूज करत आहेत.