रेल्वेस्टेशनवर चोरट्यांची टोळी, प्रवाशांना मारहाण मोबाइल लुटून न्यायचे...एकाला अटक, तिघांचा शोध सुरू

छत्रपती संभाजीनगर (मेट्रोपोलिस पोस्ट वृत्तसेवा) : रेल्वेस्टेशनवर प्रवाशांना मारहाण करत मोबाइल हिसकावून पळ काढणाऱ्या टोळीचा पोलिसांनी पर्दाफाश केला आहे. एकाला अटक केली असून, त्‍याचे ३ साथीदार फरारी आहेत. वेदांतनगर पोलीस त्यांचा शोध घेत आहेत.

मुकेश विरेंद्र टेंभरे (वय २९, रा. कवडगाव, बिडकीन ता. पैठण, मूळ रा. मध्यप्रदेश) याने या प्रकरणात तक्रार दिली आहे. तो बिडकीनच्या खासगी कंपनीत नोकरी करतो. रविवारी रात्री सव्वा आठच्या सुमारास दिवाळीच्या सुट्ट्या असल्याने तो मूळगावी किणी (ता. खैरलांजी जि. बालाघाट, मध्यप्रदेश) येथे जाण्यासाठी रेल्वेस्टेशनवर आला होता. रेल्वेस्टेशनबाहेरील सार्वजनिक मुत्रीघरात लघुशंका करून बाहेर आला एक लाल टी शर्ट घातलेला व दुसरा काळा टी शर्ट घातलेला असे दोन युवक त्याच्याकडे आले. त्यांनी मुकेशला धक्का मारून हातातील मोबाइल बळजबरीने हिसकावून घेत तोंडावर चापटबुक्क्यांनी मारून ढकलून देत पळून गेले.

मुकेशने आरडाओरड केली असता लोक जमले. मात्र तोपर्यंत चोरटे पळून गेले होते. मुकेशने तक्रार देण्यासाठी वेदांतनगर पोलीस ठाणे गाठले असता तिथे त्याच्यासारखीच लूट झालेला मनोजकुमार कैवातिया हाही तक्रार देण्यासाठी आला होता. त्याचाही मोबाइल अशाच पद्धतीने चोरट्यांनी मारहाण करून हिसकावून पळ काढला होता. मुकेशची तक्रार घेणे सुरू असतानाच पोलीस अंमलदार महाशंख दांडगे हे एक लाल शर्ट घातलेला चोरटा वेदांतनगर पोलीस ठाण्यात घेऊन आले. सय्यद स‌द्दाम सय्यद हमीद (वय २५, रा. सादातनगर गल्ली नं.१३ छत्रपती संभाजीनगर) असे त्याचे नाव असल्याचे पोलीस चौकशीत समोर आले.

त्याने त्याचे साथीदार शेख वाहेद शेख खाजा उर्फ बबलू (वय ३६, गल्ली नं. १० सादातनगर) व शेख मज्जीद (पूर्ण नाव माहीत नाही, रा. सादातनगर), छोटा कालू उर्फ नईम शेख चाँद (वय २५, रा. सादातनगर) यांच्या मदतीने प्रवाशांचे मोबाइल चोरण्याचे गुन्हे केले. चोरलेले मोबइल त्याने साथीदार शेख वाहेद शेख खाजा उर्फ बबलू याच्याकडे दिल्याचे पोलिसांना सांगितले. मुकेशचा मोबाइल ९ हजार रुपयांचा तर मनोजकुमार कैवातिया (वय २५, रा. पिसीद ता. कसडोल जि. बलोदाबाजार भाटापारा राज्य छत्तीसगड ह. मु. प्रतानगरनगर गोलवाडी छत्रपती संभाजीनगर) याचा १५ हजार रुपयांचा मोबाइल चोरट्यांनी चोरल्याचे तक्रारीत म्हटले आहे. तपास पोलीस उपनिरीक्षक संतोषकुमार जोशी करत आहेत.