२७ वर्षीय विवाहितेची सासरच्यांविरुद्ध सिडको पोलिसांत तक्रार, पतीच्या मोबाइलमध्ये एका बाईचे फोटो पाहिले अन्‌...

छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगरच्या लेकीचा नागपूरमध्ये छळ झाल्याचे प्रकरण सिडको पोलिसांच्या समोर आले आहे. पोलिसांनी तिच्या पती व सासरच्या ६ जणांविरुद्ध शुक्रवारी (१२ डिसेंबर) गुन्हा दाखल केला आहे. पिसादेवी रोड भागात राहणाऱ्या २७ वर्षीय विवाहितेने या प्रकरणात तक्रार दिली आहे.

तक्रारीनुसार, विवाहितेचे लग्न २९ नोव्‍हेंबर २०२४ रोजी नागपूर येथील युवकासोबत झाले होते. लग्नानंतर सासरच्या लोकांनी तिला एक महिना चांगले वागवले. नंतर पती, सासू, नणंदेसह सासरच्या अन्य मंडळींनी घरगुती कारणावरून तिचा छळ सुरू केला. शिवीगाळ करून हाताचापटाने मारहाण करू लागले. तू आम्हाला पसंद नाही, असे म्हणू लागले. माहेरावरून २ लाख रुपये आणण्याची मागणी करू लागले. पतीच्या मोबाइलमध्ये एका बाईचे फोटो असल्याने विवाहितेने विचारणा केली असता पतीने सांगितले, की मला तुझ्यासोबत लग्न करायचे नव्हते. पण माझी बहीण व भाऊजींच्या सांगण्यावरून तुझ्यासोबत लग्न केले आहे. त्यानंतर तिला १६ सप्‍टेंबर २०२५ रोजी घरातून काढून दिले. तिच्या आईने नागपूरला जाऊन तिला छत्रपती संभाजीनगरला परत आणले. तेव्हापासून आई-वडिलांकडेच राहते. भरोसा सेलमध्ये तडजोड न झाल्याने अखेर विवाहितेने सिडको पोलीस ठाण्यात तक्रार दिली. त्यावरून पोलिसांनी तिच्या पती, सासू, नणंदेसह सासरच्या ६ जणांविरुद्ध गुन्हा दाखल केला आहे. अधिक तपास पोलीस अंमलदार मधुकर गोरे करत आहेत.