मोकाट कुत्र्याच्या चाव्यामुळे ३ वर्षीय चिमुकल्याचा मृत्‍यू, जुना मोंढा भागातील धक्कादायक घटना

By City News Desk

On 08 Oct 2025

मोकाट कुत्र्याच्या चाव्यामुळे ३ वर्षीय चिमुकल्याचा मृत्‍यू, जुना मोंढा भागातील धक्कादायक घटना

"छत्रपती संभाजीनगर सिटी न्यूज' वेबसाईटवर प्रसिद्ध होणारा मजकूर, छायाचित्रे 'मेट्रोपोलिस पोस्ट' वृत्तपत्राच्या परवानगीशिवाय पूर्णतः किंवा अंशतः कॉपी करण्यास सक्त मनाई आहे. असे करताना कुणीही आढळल्यास कोणतीही वेगळी नोटीस न देता कायदेशीर कारवाई केली जाईल याची नोंद घ्यावी. - संपादक, मेट्रोपोलिस पोस्ट वृत्तपत्र

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : कुत्रा चावल्याने रेबीज होऊन ३ वर्षीय चिमुकल्याचा मृत्‍यू झाल्याची घटना जुना मोंढा भागातील जाफर गेट येथे समोर आल्याने खळबळ उडाली आहे. शेख अरमान शेख आमीर (वय ३) असे या चिमुकल्याचे नाव आहे. मंगळवारी (७ ऑक्‍टोबर) सकाळी ११ च्या सुमारास घाटी रुग्णालयात त्याचा मृत्‍यू झाला. कुटुंबीयांनी रेबीजचा दावा केला असला तरी, डॉक्‍टरांनी मात्र डोक्यात जखम होती, इन्फेक्शनमुळे मृत्यू झाल्याचे म्हटले आहे.

शहरात मोकाट कुत्र्यांची संख्या प्रचंड वाढली आहे. शेख आमीर यांच्या ३ वर्षीय अरमान या मुलाला १० दिवसांपूर्वी मोकाट कुत्र्याने डोक्यात चावा घेतला होता. कुटुंबीयांनी त्याला खासगी रुग्णालयात नेले. त्याची प्रकृती खालावत गेल्याने घाटी रुग्णालयात आणले. बाल रुग्ण कक्षात उपचार सुरू असताना मंगळवारी (७ ऑक्‍टोबर) सकाळी त्याचा मृत्‍यू झाला. अरमानचे वडील शेख आमीर यांनी म्हटले, की माझा मुलगा तर परत येणार नाही पण महापालिकेने व्यापक उपाययोजना कराव्यात, जेणेकरून आणखी कुणाचा बळी जाऊ नये. अरमानला व्हायरल मेनिंगा इन्फलायटिसचे निदान झाले होते. कुत्रा चावल्यानंतर जखम होऊन मेंदूच्या भागाला संसर्ग झाला. मुलाला घाटीत आणले तेव्हा प्रकृती गंभीर होती, असे घाटीतर्फे सांगण्यात आले.