छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : गतवर्षीचे एक प्रकरण पुन्हा ताजे झाले आहे. हनी ट्रॅपमध्ये अडकवून २५ वर्षीय तरुणीने कथीत सामाजिक कार्यकर्त्यासह मिळून खंडणी मागितल्याची तक्रार बँक शाखा व्यवस्थापकाने जवाहरनगर पोलीस ठाण्यात केली होती. त्यावरून १५ ऑक्टोबर २०२४ रोजी २५ वर्षीय तरुणी व तिच्या साथीदाराविरुद्ध गुन्हा दाखल झाला होता. आता या कहानीत व्टिस्ट आला आहे. ब्यूटी पार्लरसाठी कर्ज मिळवून देतो, असे आमिष दाखवून पंजाब नॅशनल बँकेच्या सिडको शाखा व्यवस्थापकाने आपल्यावर वारंवार लैंगिक अत्याचार केल्याचा आरोप करत तरुणीने न्यायालयात धाव घेतली होती. न्यायालयाच्या आदेशाने आता वर्षभराने या प्रकरणात दौलताबाद पोलिसांनी बँक शाखा व्यवस्थापक दीपक महादू येळणे (वय ३७, संस्कृत व्हिला अपार्टमेंट, जवाहरनगर कॉलनी, गारखेडा परिसर) याच्याविरुद्ध गुन्हा दाखल केला आहे.
तक्रारीनुसार, तरुणी विवाहित असून, तिने घरी ब्युटी पार्लर सुरू केले होते. व्यवसाय वाढवण्यासाठी तिने मुख्यमंत्री रोजगार निर्मिती कार्यक्रमांतर्गत १० लाखांचे कर्ज घेण्यासाठी जिल्हा उद्योग केंद्रात अर्ज केला होता. तिचा अर्ज मंजूर होऊन फाइल पंजाब नॅशनल बँकेच्या सिडको शाखेत गेली. बँक शाखा व्यवस्थापक दीपक येळणे याने तिचा मोबाइल क्रमांक घेत कर्ज मंजूर करतो, असे म्हणून व्हॉट्स ॲपद्वारे तिच्याशी संपर्क वाढवला. ८ ऑगस्ट २०२४ रोजी तरुणीला त्याने सिडको बसस्थानकाजवळील एका हॉटेलमध्ये बोलावले. कर्ज मंजूर झाल्याचे सांगून समर्थनगर येथील एका लॉजवर तिला नेत जबरदस्तीने तिच्यासोबत शारीरिक संबंध ठेवले. त्यानंतर ब्यूटी पार्लर सुरू कर, असे सांगून तिच्या एसबीआय खात्यावर स्वतःच्या आयसीआयसीआय बँक खात्यातून ७६ हजार आणि ७५ हजार रुपये पाठवले. ३ सप्टेंबर २०२४ रोजी चिकलठाणा परिसरातील एका लॉजवर बोलावून पुन्हा त्याने तिच्यासोबत शारीरिक संबंध ठेवले.
कर्ज मंजुरीची प्रक्रिया सुरू आहे, असे संबंध ठेवण्याआधी सांगितले. या वेळीही तिच्या खात्यावर ९० हजार रुपये टाकले. ६ ऑक्टोबर २०२४ रोजी त्याने तिला पुन्हा दौलताबाद परिसरातील फॉर्महाऊसवर नेत कर्ज मंजूर झाल्याचे पत्र दाखवतो, असे म्हणत पुन्हा शारीरिक संबंध प्रस्थापित केले. याचवेळी तरुणीचा ओळखीचा कथित सामाजिक कार्यकता तिथे धडकला. त्याने येळणेला रंगेहात पकडले. या प्रकारामुळे येळणे याने स्वतःवरील आरोप झाकण्यासाठी जवाहरनगर पोलीस ठाण्यात तरुणीविरुद्ध खंडणीचा खोटा गुन्हा दाखल केला, असा तक्रारीचा आशय आहे. गुन्हा दाखल करून अधिक तपास दौलताबाद पोलीस करत आहेत.
तेव्हा काय घडलं होतं?१५ ऑक्टोबर २०२४ रोजी बँक शाखा व्यवस्थापकाने दिलेल्या तक्रारीनुसार, तरुणीने ब्युटी पार्लरसाठी कर्ज हवे असल्याचे सांगितले. शहनिशा केल्यानंतर व्यवस्थापकाने निकषात बसत नसल्याने कर्ज मंजूर होऊ शकणार नसल्याचे सांगितले. त्यानंतर तरुणीने काही दिवसांनी व्यवस्थापकाला मेसेज पाठवणे सुरू केले. गोड गोड बोलून व्यवस्थापकाला छायाचित्र पाठवून जाळ्यात ओढले. व्यवस्थापकही तिच्या जाळ्यात अडकत गेला. तरुणीने प्रेमाचे नाटक सुरू केले. भेटीगाठी वाढून विविध लॉजवर शारीरिक संबंध प्रस्थापित केले. तरुणीने आग्रह करून व्यवस्थापकाला एका फार्म हाऊसवर नेले. तेथे शारीरिक संबंध प्रस्थापित करताना त्याचे चोरून चित्रण केले. कथित सामाजिक कार्यकत्याने ते व्हिडीओ बँक व्यवस्थापकाला दाखवून प्रकरण मिटविण्यासाठी सर्व कर्जाचे अर्ज मंजूर करून ४० लाख रुपयांच्या खंडणीची मागणी केली. १४ ऑक्टोबर २०२४ रोजी बँक व्यवस्थापकाने पोलीस आयुक्तांची भेट घेऊन घडलेला प्रकार सांगितला. त्यानंतर पोलिसांनी तरुणी आणि कथित सामाजिक कार्यकर्त्याला रंगेहात पकडण्यासाठी सापळा रचला. सिडको चौकात सामाजिक कार्यकर्त्याने बँक व्यवस्थापकाला गाठले. व्यवस्थापकाने त्यांना गुंतवून ठेवण्याची गरज असताना भांबावून गेला. त्याची अवस्था पाहून सामाजिक कार्यकर्त्याला संशय आला. दुरून पोलीस येत असल्याचे पाहून तरुणी व सामाजिक कार्यकर्त्याने पैशांची बॅग घेऊन पळ काढला. घटनेनंतर पोलिसांनी त्यांचे घर गाठले. मात्र ते मिळून आले नव्हते.
.jpg)
.jpg)
.jpg)
.jpg)
