सातारा परिसरात प्रॉपर्टी एजंटचा महिलेवर बलात्‍कार

छत्रपती संभाजीनगर (सीएससीएन वृत्तसेवा) : ३८ वर्षीय विवाहितेवर प्रॉपर्टी एजंटने धमकावून बलात्‍कार केल्याची धक्कादायक घटना सातारा परिसरात समोर आली आहे. सातारा पोलिसांनी मंगळवारी (५ नोव्‍हेंबर) त्‍याच्याविरुद्ध ॲट्रॉसिटीसह बलात्‍काराचा गुन्हा दाखल केला आहे. ही घटना सोमवारी (४ नोव्‍हेंबर) सायंकाळी घडली.

शेख वसीम शेख सलीम (रा. उस्मानपुरा) असे संशयिताचे नाव आहे. विवाहिता मुलासह सातारा परिसरात राहते. घर विकत घेण्यासाठी तिने वसीमची मदत घेतली होती. माफक दरात घर मिळवून देण्याचे आमिष वसीमने तिला दाखवले. सोमवारी सायंकाळी साडेपाचला त्याने देवळाई परिसरात तिला घर दाखविण्यासाठी फिरवले. त्‍यानंतर विवाहितेचे सध्याचे घर पाहायचे असल्याचे सांगून तिच्यासोबत घरी आला. घरात कुणी नसल्याची संधी साधून त्‍याने तिच्यासोबत जबरदस्ती शारीरिक संबंध ठेवल्याचे तक्रारीत म्‍हटले आहे. अधिक तपास सातारा पोलीस करत आहेत.

वाळूज महानगरात अल्पवयीन मुलीसोबत अश्लील वर्तन….
अल्पवयीन मुलीची छेड काढून तिच्या भावाला शिवीगाळ करून जीवे मारण्याची धमकी दिल्याप्रकरणी वाळूज एमआयडीसी पोलिसांनी अक्षय नावाच्या तरुणाविरद्ध गुन्हा दाखल केला आहे. साडेसतरा वर्षीय अल्पवयीन मुलगी कुटुंबासह वाळूज महानगरात राहते. तीन दिवसांपूर्वी तिचे आई-वडील मूळगावी गेल्यानंतर ती व तिचा भाऊ घरी होते. सोमवारी (४ नोव्‍हेंबर) रात्री साडेनऊला अक्षय तिच्या घराजवळ आला. त्‍याने तिचा हात पकडून तू मला खूप आवडतेस असे म्हणून तिला घरात ओढत घेऊन गेला.

घरात तिच्यासोबत अश्लील चाळे करू लागला. याचवेळी तिचा भाऊ आला असता अक्षय पळून गेला. मंगळवारी (५ नोव्‍हेंबर) सकाळी दहाच्या सुमारास अक्षयने दारू पिऊन तिच्या घरासमोर येत तिच्याशी वाद घालायला सुरुवात केली. तिच्या भावाने त्‍याला विरोध केला असता अक्षयने त्‍याला शिवीगाळ करीत जिवे मारण्याची धमकी दिली. दोन दिवसांपासून अक्षय मुलीची छेड काढून धमक्या देत बहीण-भाऊ दहशतीखाली आले. त्‍यांचे आई- वडील गावावरून परतल्यानंतर या प्रकरणात वाळूज एमआयडीसी पोलीस ठाण्यात अक्षयविरुद्ध तक्रार देण्यात आली.