विवाहबाह्य संबंध २८ वर्षीय तरुणीच्या अंगलट‌!; तिच्या पतीला कळले, तिने प्रियकराशी नाते तोडले, पुढे घडला हा ड्रामा…

छत्रपती संभाजीनगर (सीएससीएन वृत्तसेवा) : विवाहबाह्य संबंध ठेवणे एका विवाहित तरुणीला चांगलेच महागात पडले. पती, मुलाची पर्वा न करता ती एका विवाहित तरुणाच्या प्रेमसंबंधात आली. व्हिडीओ कॉलवरही दोघे बोलू लागले. ही बाब तिच्या पतीला कळल्यानंतर त्‍याने तिला समजावून सांगितले. त्‍यानंतर तिने अफेअर बंद केले, पण त्‍यानंतर त्‍याचा त्रास सुरू झाला. तो प्रेमहट्टाला पेटला. त्‍यातच त्‍याच्या घरीही दोघांचे अफेअर माहीत झाल्याने त्‍याच्या पत्‍नीनेही माझा संसार खराब करतेस काय, असा जाब विचारला आणि जीवे मारण्याची धमकी दिली… वाळूज महानगरात हा प्रकार समोर आला आहे आणि आता विवाहितेच्या तक्रारीवरून पोलिसांनी तिच्या प्रियकरासह त्‍याच्या पत्‍नी आणि मेव्हणीविरुद्ध गुन्हा दाखल केला आहे.

काय आहे भानगड..?
वाळूज महानगरात २८ वर्षीय काजल (नाव बदलले आहे) पती, लहान मुलासह राहते. मुलगा आजारी पडल्याने व डॉक्‍टरांनी शस्‍त्रक्रिया करण्याची आवश्यकता सांगितल्याने ती अहिल्यानगर जिल्ह्यातील सासरी गेली होती. तिथे मुलावर एका रुग्णालयात उपचार करण्यात आले. या रुग्णालयातील किरण साबळे नावाच्या कर्मचाऱ्यासोबत काजलची ओळख होऊन मैत्री झाली. मैत्री वाढत जाऊन दोघांत प्रेमसंबंध निर्माण झाले. काजल वाळूज महानगरात परतल्यानंतरही दोघांतील प्रेमप्रकरण सुरूच होते.

किरण तिला सातत्याने फोन करत होता. दोघांत गप्पा व्हायच्या. सोशल मीडियावर व्हिडीओ कॉलही होत होते. पतीच्या लपूनछपून हे सारे होत असताना एकेदिवशी तिच्या या प्रेमप्रकरणाची भनक पतीला लागली. त्‍याने काजलला समजावून सांगितले. त्‍यामुळे तिने किरणशी संवाद बंद केला. मात्र किरण प्रेमहट्ट सोडायला तयार होत नव्हता. तो सतत तिला कॉल करू लागला. दोघांच्या या वादात त्‍याच्या घरीही सर्व माहीत झाले.

गुरुवारी (७ नोव्‍हेंबर) सकाळी अकराला किरणच्या पत्नीने काजलला कॉल केला आणि तुझ्यामुळे माझ्या संसाराचे वाटोळे झाले. मी तुला जिवंत सोडणार नाही, असे धमकावले. किरणच्या मेव्हणीनेही काजलला कॉल केला. तू माझ्या बहिणीच्या संसाराचे वाटोळे करू नको अन्यथा तुला जीवे मारून टाकू, अशी धमकी तिने काजलला दिली. प्रेमहट्टाला पेटलेला किरण, त्‍यात त्याची पत्नी व मेव्हणी कॉल करून धमक्या देत असल्याने वैतागलेल्या काजलने वाळूज एमआयडीसी पोलीस ठाणे गाठून तिघांविरुद्ध तक्रार दिली. त्‍यावरून पोलिसांनी गुन्हा दाखल केला असून, अधिक तपास केला जात आहे. यासंदर्भातील वृत्त आजच्या अंकात एका प्रसिद्ध वृत्तपत्राने दिले आहे.