छत्रपती संभाजीनगर (सीएससीएन वृत्तसेवा) : रोकडिया हनुमान कॉलनीतील विज्ञानवर्धिनी हायस्कूलमध्ये धक्कादायक प्रकार समोर आला आहे. सोमवारी (११ नोव्हेंबर) सकाळी मुख्याध्यापकांनी शाळा उघडली तेव्हा त्यांना समोर जे दिसले ते भयावह होते. काळी बाहुली, पांढऱ्या रांगोळीने गोल काढून त्यावर पणती, एका शिक्षिकेचे नाव लिहून तू गई… असे लिहिलेले, दोन लिंबू कापून त्यावर हळदी- कुंकू टाकलेले अन् काळे केस गुंडाळलेले… शाळेच्या बंद खोल्यांच्या कुलूपांना हळदी- कुंकू लावलेले… असे सारे चित्र पाहून मुख्याध्यापक हादरून गेले… या प्रकरणात क्रांती चौक पोलीस ठाण्यात ज्या शिक्षिकेचे नाव लिहून जादूटोणा केला गेला, त्या शिक्षिकेने तक्रार दिली असून, अज्ञात व्यक्तीकडून आपल्या जिवास धोका असल्याचे म्हटले आहे. पोलिसांनी गुन्हा दाखल करून आता काळ्या जादूवाल्या बाबाचा शोध सुरू केला आहे.
शाळेच्या ४० वर्षीय शिक्षिकेने या प्रकरणात तक्रार नोंदवली आहे. तक्रारीनुसार, त्या खोकडपुऱ्यात राहतात. विज्ञानवर्धिनी हायस्कूलमध्ये १३ वर्षांपासून नोकरी करतात. शाळेत पाचवी ते दहावीपर्यंतच्या विद्यार्थ्यांना त्या शिकवतात. शाळेला एकूण ४ रूम असून स्टाफमध्ये एकूण पाच कर्मचारी आहेत. त्यात तीन महिला व दोन पुरुष आहेत. ३१ ऑक्टोबरला शाळेला दिवाळीच्या सुट्ट्या लागल्या होत्या. २ नोव्हेबरपर्यंत सुट्ट्या होत्या. ४ नोव्हेंबरपासून शाळेचे कार्यालय चालू झाले होते. ९ नोव्हेंबरला दुपारी १२ वाजता नेहमीप्रमाणे शाळेचे कार्यालय व शाळा बंद करून मुख्याध्यापक घरी गेले होते.
मुख्याध्यापक अविनाश दत्तात्रय शंकपाळ (रा. चिकलठाणा) यांनी सोमवारी सकाळी साडेदहाला शाळा उघडली. तेव्हा त्यांनी पाहिले की शाळेच्या व्हरंड्यात ऑफिससमोर एक मोठी काळी बाहुली व पांढऱ्या रांगोळीने गोल काढून एक पणती ठेवलेली होती. त्यावर हळंदी कुंकू टाकलेले व पांढऱ्या रांगोळीने गुणीलेचे चिन्ह काढून त्यावर “तक्रारदार शिक्षिकेची नाव लिहून तू गई’ असे लिहिले होते. आणखी एक काळा बाहुला ठेवलेला होता. त्यावर लिंबू, कवडी, मिरची असे काळ्या धाग्यात बांधून ठेवलेले होते.
दोन लिंबू कापून त्यावर हळदी- कुंकू टाकलेले होते. त्याला काळे केस गुंडाळलेले होते. लाकडासारखी वस्तू जाळलेली दिसली. त्यावर कडुलिंबाची पाने टाकलेली होती. त्यावर राख पसरलेली होती…. अशा प्रकारचा जादूटोणा केलेला होता. शाळेच्या बंद खोल्यांच्या कुलूपांना हळदी- कुंकू लावलेले होते. हे दृश्य पाहिल्यानंतर मुख्याध्यापकांनी लगेचच शिक्षिकेला कॉल करून माहिती दिली. त्यानंतर शिक्षिका व त्यांचे पती शाळेत आले. त्यांनी हे दृश्य पाहिले. कोणीतरी अज्ञात व्यक्तीने माझ्या शरीरास व जिवीतास धोका व्हावा या उद्देशाने हे कृत्य केल्याचे शिक्षिकेने तक्रारीत म्हटले आहे. अधिक तपास पोलीस निरीक्षक सुनील माने करत आहेत.
.jpg)
.jpg)
