छत्रपती संभाजीनगर (सीएससीएन वृत्तसेवा) : तरुण-तरुणी दोघे रात्री उशिरापर्यंत बोलत होते. अचानक त्यांच्यात कुठल्या तरी विषयावर वाद झाला. त्यानंतर तरुणाने खिशातील चाकू काढून स्वतःला गळा कापून आत्महत्येचा प्रयत्न केला. ही धक्कादायक घटना शनिवारी (६ जुलै) रात्री दहाच्या सुमारास चिश्तिया चौक परिसरात घडली.
मुजम्मिल आरिफ खान (वय २८, रा. चिश्तिया चौक परिसर) असे जखमी तरुणाचे नाव आहे. बराच वेळ गप्पा मारल्यानंतर तरुण-तरुणींत वाद सुरू झाला. त्यामुळे तरुणी एमजीएमच्या दिशेने पायी निघून जाऊ लागली. मुजम्मिल तिचा पाठलाग करून बोलण्याचा प्रयत्न करत होता. काही अंतरावर त्याने तिचा हात पकडून बोलण्याचा प्रयत्न केला. ती ऐकत नसल्याचे पाहून तरुणाने चाकूने गळा कापून घेतला. यामुळे घाबरलेल्या तरुणीने आरडाओरडा केली. नागरिकांनी धाव घेत मुजम्मिलला जवळील एमजीएम रुग्णालयात दाखल केले.
घटनेची माहिती मिळताच सिडको पोलीस ठाण्याचे पोलीस निरीक्षक अतुल येरमे यांनी घटनास्थळी धाव घेतली. मुजम्मिल जुन्या गाड्यांच्या खरेदी-विक्रीचा व्यवसाय करतो. तो विवाहित असून पत्नी, दोन मुलांसह चिश्तिया परिसरात राहतो. घटनेच्या नेमक्या कारणाचा तपास केला जात आहे. घटनेनंतर मुजम्मिलच्या कुटुंबाने रुग्णालयात धाव घेतली. गळ्याची नस कापली गेल्याने डॉक्टरांनी शस्त्रक्रिया केली. मुजम्मिल गेल्या चार-पाच दिवसांपासून आपला पाठलाग करत असल्याचे तरुणी सांगत होती. पण मग दोघांत दीर्घकाळ काय चर्चा सुरू होती, याबद्दल प्रश्न निर्माण झाला आहे.
.jpeg)
