छत्रपती संभाजीनगर (दिव्या पुजारी : सीएससीएन वृत्तसेवा) : टोळीयुद्धात तिघांची हत्या केल्यानंतर पंजाबचे सहा गँगस्टर्स नांदेडला आले. तिथून जालना, नंतर समृद्धी महामार्गाने मुंबईला जात असतानाच छत्रपती संभाजीनगर शहरच्या साहसी पोलिसांनी बोगद्यातच त्यांना हॉलीवूडस्टाइल घेराव घातला… त्यांना कारमधून उतरण्याच्या सूचनाही देऊनही उतरत नसल्याने एके-४७ ने काच फोडून त्यांच्यावर बंदुका रोखण्यात आल्या…हा थरार शनिवारी (७ सप्टेंबर) पहाटे पाचला घडला. छत्रपती संभाजीनगर शहर पोलिसांच्या या धाडसी कारवाईचे महाराष्ट्रच नव्हेतर पंजाबमध्येही कौतुक होत आहे.
पंजाबच्या फिरोजपूर शहरात २ महिन्यांपासून गँगवार सुरू आहे. यातूनच ३ सप्टेंबरला ९ गँगस्टर्सनी दुचाकीवरून येत कारमधील आकाशदीप सिंह, त्याचा मुलगा दिलप्रीत सिंह आणि मुलगी जसप्रीत कौर यांची हत्या केली. हल्लेखोरांनी २० राऊंड फायर केले. जसप्रीतचे एक महिन्यानंतर लग्न होणार होते. लग्नाच्या खरेदीसाठी तिघे बापलेक निघाले होते. जाताना त्यांनी अकालगढ गुरुद्वारात दर्शन घेतले. गुरुद्वारातून बाहेर पडल्यावर कारमध्ये बसत असतानाच त्यांच्यावर अंधाधुंद गोळीबार करण्यात आला. या घटनेने पंजाबमध्ये खळबळ उडाली. पंजाबच्या अँटी गँगस्टर टास्क फोर्सचे अप्पर महासंचालक प्रमोद बान यांनी हल्लेखोरांच्या शोधासाठी पथके तैनात केली. युद्धपातळीवर त्यांचा शोध सुरू केला. केंद्रीय गुप्तचर यंत्रणाही अलर्ट झाल्या.
६ हल्लेखोर रेल्वेने गुरुवारी (५ सप्टेंबर) नांदेडला गेल्याचे यंत्रणांच्या तपासात समोर आल्याने महाराष्ट्रातील नेटवर्कच्या आधारे त्यांच्यावर पाळत ठेवण्यात आली. शुक्रवारी एका धार्मिकस्थळात मुक्काम करून खासगी कारने हल्लेखोर मुंबईला पळून जात होते. नांदेडवरून पहाटे तीनला ते जालन्यात पोहोचले. जालन्यात पाऊण तास वेळ घालवला. तिथून समृध्दी महामार्गाने मुंबईला निघाले होते. पंजाबच्या अँटी गँगस्टर टास्क फोर्सचे अप्पर महासंचालक प्रमोद बान यांनी छत्रपती संभाजीनगर शहरचे पोलीस आयुक्त प्रवीण पवार यांना संपर्क केला.
… अन् ॲक्शन!
पोलीस आयुक्त श्री. पवार यांनी गुन्हे शाखेचे निरीक्षक संदीप गुरमे यांच्याकडे गँगर्स्टसना पकडण्याची मोहीम सोपवली. श्री. गुरमे व गजानन कल्याणकर यांनी सहायक पोलीस निरीक्षक काशिनाथ महांडुळे, विनायक शेळके, संदीप सोळंके, विशाल बोडखे, प्रवीण वाघ, प्रशांत मुंढे, महादेव गायकवाड, सचिन वायाळ, बलभीम गोरे यांच्यासह तब्बल ४० शीघ्र कृती दलाच्या जवानांसह मोहीम आखली. गँगस्टर्सवर समृद्धीच्या बोगद्यातच हल्लाबोल करण्याचे ठरले. दोन्ही दिशेने एके-४७, एमपी-५ बंदुकीसह पोलीस वाहनात बसून होते. बोगद्याच्या टोकाला तीन ट्रक उभे करण्यात आले. गँगस्टर्सची इनोव्हा कार तेथे येताच थांबली. त्याचवेळी चारही दिशेने पोलिसांनी कारला घेराव घातला. त्यांच्याकडे शस्त्रांची शक्यता होती. त्यामुळे आधी दुरून त्यांना कारखाली उतरण्याची सूचना केली. मात्र ते ऐकत नव्हते. त्यामुळे दोन उपनिरीक्षकांनी एके-४७ ने कारची काच फोडून त्यांच्यावर बंदुका रोखण्यात आल्या.
गुप्तचर यंत्रणा होत्या अलर्ट…
हल्लेखोर नांदेडला आल्याचे कळताच त्यांच्यावर पाळत ठेवणे सुरू झाले. जालन्याला ते पाऊण तास थांबले. तेही गुप्तचर अधिकाऱ्यांनी हेरले. ते समृद्धीवर येताच शहर पोलिसांना ॲक्शनच्या सूचना करण्यात आल्या. पोलीस आयुक्त श्री. पवार यांनी एवढी मोठी कामगिरी करणाऱ्या पथकाला ३ लाख रुपयांचे बक्षीस जाहीर केले आहे. शहर पोलिसांचे सगळीकडे कौतुक होत आहे.
.jpg)
