परधर्मीय मुलीसोबत गप्पा मारणाऱ्या तरुणाला अटक; अपनी बच्ची को भगा के ले जा रहा है म्हणत जमावाने केली होती मारहाण, जमावाविरुद्धही गंभीर स्वरुपाचे गुन्हे दाखल

छत्रपती संभाजीनगर (सीएससीएन वृत्तसेवा) : परधर्मीय मुलीसोबत रस्त्यावर गप्पा मारणे एका तरुणाला चांगलेच महागात पडले. त्‍याला जमावाने बेदम मारहाण केली होती. त्‍याला आता अटक करण्यात आली असून, त्‍याच्याविरुद्ध अल्पवयीन मुलीचा विनयभंग आणि पोक्‍सो कायद्यानुसार गुन्हा दाखल करण्यात आला आहे. मारहाण करणाऱ्या जमावाविरुद्धही गंभीर स्वरुपाचा गुन्हा दाखल करण्यात आला आहे. ही घटना जिल्हाधिकारी कार्यालयासमोरील चौकात (लेबर कॉलनी) २५ जून रोजी दुपारी घडली होती.

आकाश सुनील शिंदे (वय १९, रा. देवगाव फाटा, येवला, ह. मु. आदर्शनगर, केम्ब्रिजमागे) असे अटक करण्यात आलेल्या तरुणाचे नाव आहे. त्‍याला फातेमा (नाव बदलले आहे) नावाची अल्पवयीन मैत्रीण आहे. दोघे गप्पा मारत असतानाच दोन दुचाकीवर चार जण तिथे आले. त्यांनी आकाशला बुरख्यातील ही मुलगी तुझी कोण आहे, अशी विचारणा केली. त्यावर आकाशने मैत्रीण असल्याचे सांगितले. त्‍यामुळे चौघांनी त्‍याला मारहाण करत लोकांना जमा केले.

देखो अपनी बच्ची को भगा के ले जा रहा है, असे म्हणत विशिष्ट धर्माच्या लोकांना बोलावल्याने मोठा जमाव जमला. या जमावाला आकाशने ती माझी केवळ मैत्रीण आहे, असे सांगितले. पण जमाव ऐकण्याच्या मनःस्थितीत नव्हता. त्‍यांनी आकाशला बेदम मारहाण सुरूच ठेवली. अल्पवयीन मुलीलाही मारहाण केली. दोघांना जमावाने मोकळ्या जागेत नेत जान से मार डालो साले को, बचना नही चाहिये, असे म्हणत जीवे मारण्याचा प्रयत्‍न केला. यात आकाश गंभीर जखमी झाला. कसाबसा जीव वाचवून त्याने तिथून पळ काढला.

आकाशला जीवे मारण्याचा प्रयत्‍न केल्याने सिटी चौक पोलिसांनी मारहाण करणाऱ्या १५ ते २० जणांविरुद्ध गुन्हा दाखल केला आहे. आकाशने तक्रार दिल्याचे कळताच आकाशच्या मैत्रिणीनेही आकाशविरुद्ध विनयभंगाची तक्रार नोंदवली आहे. आकाश माझी इच्छा नसतानाही गळ्यात हात टाकत होता. तू असे करू नको, मला नंतर फोन करू नको, भेटू नको, असे म्हणूनही आकाश ऐकत नव्हता, असे तिने तक्रारीत म्हटले आहे. त्यावरून पोलिसांनी आकाशविरुद्ध पोक्‍सो कायद्यानुसार गुन्हा दाखल केला आहे.