दौलताबादजवळ भीषण अपघातात आई-वडील, मुलगा जागीच ठार, जावई-लेक गंभीर जखमी, भरधाव कार अवजड वाहनाला धडकली…

छत्रपती संभाजीनगर (दिव्या पुजारी : सीएससीएन वृत्तसेवा) : भरधाव कार रस्त्यावर उभ्या असलेल्या अज्ञात वाहनावर धडकली. यात आई-वडिलांसह मुलाचा मृत्‍यू झाला, तर दोघे जखमी झाले. ही भीषण दुर्घटना शनिवारी (६ जून) पहाटे साडेचारच्या सुमारास सोलापूर-धुळे महामार्गावरील दौलताबादनजिकच्या फतियाबाद येथे घडली. हे कुटुंब कन्‍नड तालुक्यातील अंधानेर येथे बाळू मामाच्या मंदिरात दर्शनासाठी गेले होते. परतताना काळाने त्‍यांच्यावर घाला घातला.

राजू आसाराम उचित (वय ६०), अलका राजू उचित (वय ५५) आणि अर्जुन राजू उचित (वय २५, रा. वाळूज, ता. गंगापूर) अशी मृत्‍यू झालेल्यांची नावे आहेत. किरण भाऊसाहेब दहितुले (वय २५)आणि त्यांची पत्नी आरती किरण दहितुले (वय २२, रा. कांगुणी, जि. अहमदनगर) हे गंभीर जखमी झाले आहेत. राजू उचित हे पत्नी, मुलगा, जावई किरण व मुलगी आरती यांच्यासह शुक्रवारी रात्री अकराला कारने अंधानेरला गेले होते.

दर्शन घेऊन शनिवारी पहाटे परतत असताना फतियाबादजवळील एका हॉटेलसमोर रस्त्यावर उभ्या एका अज्ञात अवजड वाहनावर त्यांची कार जोरात आदळली. अपघातानंतर अवजड वाहनचालक वाहनासह पसार झाला. किरण व आरती यांच्यावर छत्रपती संभाजीनगर शहरातील खासगी दवाखान्यात उपचार सुरू आहेत. दौलताबाद पोलिसांनी या घटनेची नोंद घेतली आहे. शनिवारी दुपारी चारच्या सुमारास आई-वडील, मुलावर वाळूज येथे अंत्यसंस्कार करण्यात आले. एकुलता एक मुलगा असलेल्या अर्जुनचे तीन महिन्यांपूर्वी लग्न झाले होते. त्‍याची पत्नी काही दिवसांपूर्वी माहेरी सातारा येथे गेल्याचे सूत्रांनी सांगितले.