बिडकीन, ता. पैठण (सीएससीएन वृत्तसेवा) : पाणरांजणगाव (ता. पैठण) शिवारातील डबक्यात दोन सख्ख्या अल्पवयीन बहिणींचे मृतदेह रविवारी (२५ ऑगस्ट) दुपारी आढळल्याने खळबळ उडाली आहे. डबक्यात बुडून मृत्यू झाल्याबद्दल संशय असून, नातेवाइकांनी घातपात असल्याचे म्हटले आहे. कोणीतरी कपड्यांत दगड घालून त्यांना बुडवल्याची शंका व्यक्त होत आहे. त्यामुळे प्रकरणाचे गांभीर्य वाढले आहे. बकऱ्या चारण्यासाठी या बहिणी गेल्या होत्या.
प्राची पेदरस चव्हाण (वय १५) व मल्लिका पेदरस चव्हाण (वय १२) अशी मृत्यू झालेल्या बहिणींची नावे आहेत. पाणरांजणगाव शिवारातील टेकडीवर पेदरस चव्हाण कुटुंबीयांसह राहतात. त्यांच्या प्राची व मल्लिका या मुली रविवारी सकाळी बकऱ्या चारण्यासाठी गेल्या होत्या. दुपारी तीनला गावातील दत्तू नावाच्या तरुणाने बकऱ्या घरी आणून घातल्या. त्याला चव्हाण कुटुंबीयांनी विचारले असता त्याने बकऱ्या मोकाट चरत होत्या. त्यांच्यामागे कुणी नव्हते, म्हणून घरी आणून सोडल्याचे सांगितले. मुलींबद्दल त्याला काहीच माहीत नसल्याचे तो म्हणाला. त्यामुळे घाबरून गेलेल्या चव्हाण कुटुंबीयांनी मुलींचा शोध सुरू केला. बल्लाळपूर ते म्हारोळा दरम्यान असलेल्या पाण्याच्या डबक्याजवळ पायातील चप्पल, भाजीपाला, काठी पडलेली होती.
पेदरस यांचा जावई कुलमुख काळे याने तत्काळ पाण्यात उतरून शोध घेतला असता दोघी बुडालेल्या आढळल्या. घटनेची माहिती बिडकीन पोलिसांना कळवताच सहायक पोलीस निरीक्षक नारायण गिते, पोलीस उपनिरीक्षक महेश घुगे, अशोक माने, सहायक फौजदार अशोक सोकटकर यांनी घटनास्थळी धाव घेतली. दोघींचे मृतदेह बाहेर काढून बिडकीन ग्रामीण रुग्णालयात आणण्यात आले. डॉक्टरांनी तपासून त्यांना मयत घोषित केले. दोघींच्या घातपाताची शक्यता व्यक्त होत आहे. बिडकीन पोलिसांनी घटनेची नोंद घेऊन सर्वांगाने तपास सुरू केला आहे. तपास पोलीस उपनिरीक्षक महेश घुगे करीत आहेत.
छत्रपती संभाजीनगरात बावडीत बुडून मुलाचा मृत्यू….
छत्रपती संभाजीनगर शहरातील हिमायतबागेतील शक्कर बावडीत तीन मित्रांसोबत पोहण्यासाठी गेलेल्या महेश आसाराम जगधने (वय १७, नागेश्वरवाडी) याचा बुडून मृत्यू झाला. ही घटना रविवारी (२५ ऑगस्ट) दुपारी घडली. चारपैकी एकालाच पोहता येत होते. तरी सर्व जण विहिरीत उतरले. महेश बुडू लागला. बाकीच्यांनी त्याला वाचवायचा प्रयत्न केला. पण यश आले नाही. पोलिसांना कळताच त्यांनी तातडीने अग्निशमन विभागाला कळवले. अग्निशमन विभागाच्या जवानांनी घटनास्थळी येऊन महेशला विहिरीबाहेर काढले. घाटी रुग्णालयात नेल्यानंतर डॉक्टरांनी त्याला मृत घोषित केले. महेशचे नववीपर्यंत शिकलेला होता. कुटुंबाला मदत करण्यासाठी हॉटेलमध्ये काम करत होता, असे पोलिसांनी सांगितले. बेगमपुरा पोलिसांनी अाकस्मिक मृत्यूची नोंद केली आहे.
.jpg)
