दुचाकी घसरून एकाचा मृत्‍यू, दुसऱ्याची प्रकृती गंभीर, दौलताबादजवळील दुर्घटना, दोघेही जळगावचे…

दौलताबाद (सीएससीएन वृत्तसेवा) : छत्रपती संभाजीनगर ते खुलताबाद मार्गावरील दौलताबादजवळील अब्दिमंडीजवळ दुचाकी घसरून एकाचा मृत्‍यू तर दुसरा जखमी झाला. हा अपघात शुक्रवारी (२ ऑगस्ट) दुपारी एकच्या सुमारास झाला.

प्रीतम प्रेमदास पवार (वय ३१, रा. लोंजे, ता. चाळीसगाव, जि. जळगाव) असे मृत्‍यू झालेल्याचे तर समाधान रुपचंद पवार (वय २७, रा. लोंजे, ता. चाळीसगाव, जि. जळगाव) असे जखमीचे नाव आहे. दोघे चुलत भाऊ कामानिमित्त दुचाकीने (एमएच १९, सीएस २७३३) शुक्रवारी सकाळी छत्रपती संभाजीनगरला आले होते. काम आटोपून दुपारी गावाकडे निघाले. अब्दिमंडीजवळ त्यांची दुचाकी घसरून दोघेही रस्त्यावर पडले.

दौलताबाद पोलीस ठाण्याचे पोलीस उपनिरीक्षक कृष्णा घायाळ, ज्ञानेश्वर कोळी, महेश घुगे यांनी घटनास्थळी धाव घेऊन ग्रामस्थांच्या मदतीने दोघांना छत्रपती संभाजीनगर येथील घाटी रुग्णालयात आणले. डॉक्टरांनी तपासून प्रीतम पवार याला मृत घोषित केले, तर समाधान पवारवर उपचार सुरू आहेत. या घटनेची नोंद दौलताबाद पोलिसांनी घेतली आहे. प्रीतम पवार यांचे वडील प्रेमदास पवार एसटी महामंडळात वाहक असून, प्रीतम गावात कृषी सेवा केंद्र चालवत होते. त्याच्या पश्चात आई-वडील, पत्नी व १ वर्षाचा मुलगा आहे.

दौलताबाद किल्‍ल्‍याजवळ दुसरा अपघात…
दौलताबाद येथील किल्ल्याजवळ शुक्रवारी रात्री साडे नऊला दुचाकी घसरून आणखी एक अपघात झाला. अजय डोंगरसिंग राठोड, भारतसिंग डोंगरसिंग राठोड (रा. रांजणगाव शे.पुं., ता. गंगापूर) हे जखमी झाले. ते छत्रपती संभाजीनगरहून खुलताबादकडे निघाले होते. किल्ल्याजवळ आल्यानंतर दुचाकी घसरून दोघेही जखमी झाले. त्यांना छत्रपती संभाजीनगर येथील घाटी रुग्णालयात दाखल करण्यात आले.