दिसतं तितकं सोपं नसतं… अनोळखी महिलेला मोबाइल नंबर दिला, तिनं त्‍याचा करेक्‍ट कार्यक्रम केला!; रेल्‍वेस्टेशन रिक्षास्टँडवर नक्की काय झालं वाचा…

छत्रपती संभाजीनगर (सीएससीएन वृत्तसेवा) : एका तरुणाला अनोळखी महिलेसोबत जवळीक साधणे चांगलेच महागात पडले. तिला त्‍याने मोबाइल नंबर दिला… पण नंतर तिने गोडीगुलाबीने त्‍याला रेल्वेस्टेशन रिक्षा स्टँडवर बोलावून घेत त्‍याचा करेक्‍ट कार्यक्रम केला. तिच्या पतीने तू माझ्या बायकोला मोबाइल नंबर कसा काय दिला, असे म्‍हणत साथीदारासोबत मिळून लोखंडी रॉड, बेल्टने बेदम मारहाण केली. ही घटना गुरुवारी (२२ ऑगस्ट) दुपारी चारच्या सुमारास घडली.

कृष्णा तिमन्ना चव्हाण (वय २६, रा. शिरोळ मांजरवाडा ता. निलंगा जि. लातूर ह. मु. भारतनगर वाळूज) याने दिलेल्या तक्रारीत म्‍हटले आहे, की गुरुवारी (२२ ऑगस्ट) सकाळी ११ च्या सुमारास तो रेल्वेने लातूर येथून छत्रपती संभाजीनगरात आला. रेल्वेस्टेशन सिटी बसस्टॉपजवळ आला असता तेथे रिक्षात एक महिला व रिक्षाचालक असे त्याच्याकडे आले. त्यांनी विचारले की, कुठे जायचे आहे? त्यावर कृष्णाने वाळूजला जायचे असल्याचे सांगितले. त्यावर दोघे म्हणाले, की बाबा पेट्रोलपंपापर्यंत चला. कृष्णा रिक्षात बसून बाबा पेट्रोलपंप येथे उतरला. त्यावेळी त्याच्याकडे सुट्टे पैसे नसल्याने सुट्टे पैसे करण्यासाठी पानटपरीवर जाऊन सुट्टे पैसे करून रिक्षाजवळ आला. त्यावेळी रिक्षाचालक तिथे नसल्याने रिक्षात बसलेल्या महिलेकडे त्याने १० रुपये दिले. त्यावेळी तिने विचारले की, तुम्ही कोठे काम करता? त्यावर कृष्णाने सांगितले, की तो वाळूज येथे चालक म्हणून काम करतो.

तुम्हाला काही मदत लागल्यास माझा मोबाइल नंबर घ्या व मला कॉल करा, असे म्हणून कृष्णाने तिला त्याचा मोबाइल नंबर दिला होता. त्यानंतर दुपारी साडेबाराला त्या महिलेने कृष्णाला कॉल करून काम असल्याचे सांगून त्याला रेल्वेस्टेशनवर बोलावले. दुपारी चारला तो रेल्वेस्टेशन रिक्षा स्टॅन्डवर गेला असता महिला व तिच्यासोबत दोघे अनोळखी व्यक्‍ती कृष्णाकडे आले. त्‍या व्यक्‍तींची नावे चक्रधर कटारे व गणेश बनकर असल्याचे त्‍यांनी सांगितले. चक्रधरने तू माझ्या बायकोला मोबाइल नंबर का दिला, असे म्हणून मारहाण करून त्याच्या हातातील लोखंडी रॉडने कृष्णाच्या डोक्‍यात मारले. गणेश बनकर याने बेल्टने मारहाण केली. जखमी कृष्णाने वेदांतनगर पोलीस ठाणे गाठले असता पोलिसांनी मेडीकल मेमो देऊन घाटी रुग्णालयात पाठवले. पोलिसांनी चक्रधर कटारे व गणेश बनकर यांच्याविरुध्द गुन्हा दाखल केला आहे. अधिक तपास पोलीस अंमलदार नरेंद्र गुजर करत आहेत.