छत्रपती संभाजीनगर (सीएससीएन वृत्तसेवा) : एसटी बसमधून उतरलेल्या तरुणाच्या हालचालींवर संशय आल्याने सिडको बसस्थानकावर नियुक्त स्थिर सर्वेक्षण पथकाने त्याला थांबण्याचा इशारा केला. मात्र तो पळू लागला. त्यामुळे काहीतरी गडबड असल्याची खात्री पथकाला पटली. त्यांनी पाठलाग करून त्याला पकडले असता त्याच्या बॅगमध्ये तब्बल साडेसात लाख रुपये रोख आणि सोन्याचे दागिने मिळून आले. मुकुंदवाडी पोलिसांनी रोख रक्कम, दागिने जप्त केले. बुधवारी (२३ ऑक्टोबर) रात्री ११ ला ही कारवाई करण्यात आली.
अजिज सरकार (२७) असे संशयिताचे नाव असल्याचे पोलीस निरीक्षक शिवाजी तावरे यांनी पत्रकारांना सांगितले. सध्या विधानसभा निवडणुकीमुळे सगळीकडे कडेकोट बंदोबस्त लावण्यात आला आहे. वाहनांची कसून चौकशी तर केली जातच आहे, पण बसस्थानकावरही पथके नेमून संशयास्पद भासणाऱ्या प्रवाशांची तपासणी केली जात आहे. बेहिशेबी रोख रक्कम, अवैध दारूची तस्करी प्रामुख्याने रोखली जात आहे. बुधवारी रात्री सिडको बसस्थानकावर स्थिर सर्वेक्षण पथकाचे पोलीस अंमलदार दिलीप सोनवणे, प्रभाकर पाटील, राजेश दाभाडे कर्तव्यावर असताना रात्री ११ वाजता एसटी बसमधून एक तरुण उतरला.
पोलिसांना पाहून त्याने चालण्याचा वेग वाढवला. पथकाला संशय आला. त्यांनी त्याला आवाज देऊन थांबायला सांगितले. मात्र तो पळू लागला. पथकाने पाठलाग करून त्याला पकडले. पथकप्रमुख अमोल राठोड यांनी त्याची बॅग तपासली असता बॅगमध्ये ७ लाख ५० हजार रोख, ४ ग्रॅम सोने व अन्य धातूच्या चार बांगड्या आढळल्या. त्याला या रोखरक्कम आणि दागिन्यांबाबत विचारणा केली असता उडवाउडवीची उत्तरे देऊ लागला. त्यामुळे पथकाने ऐवज जप्त केला. पोलीस उपायुक्त नवनीत काँवत, सहायक आयुक्त डॉ. रणजित पाटील, पोलीस निरीक्षक शिवाजी तावरे यांच्या मार्गदर्शनाखाली ही कारवाई करण्यात आली. रोख रक्कम व सोने जिल्हास्तरीय चौकशी समितीमार्फत वरिष्ठ कोषागार कार्यालयात जमा करण्यात आले.
कोऱ्या करकरीत नोटांमुळे संशय बळावला..
अजिजकडे पोलिसांनी चौकशी केली असता त्याने तो सराफ्याकडे नोकरीला असल्याचे सांगितले व हा दागिन्यांचा पैसा असल्याचे म्हणाला. मात्र नोटांचे बंडल कोरे करकरीत असल्याने पोलिसांचा संशय बळावला. तो मूळचा पश्चिम बंगालचा असून मतदान कार्ड मात्र छत्रपती संभाजीनगर शहरातील कबाडीपुऱ्याचे आहे. त्याबाबतही तो समाधानकारक उत्तर देऊ शकला नाही. त्याला आता सात दिवसांत पैसे आणि दागिन्यांबाबत खुलासा करावा लागणार आहे.
छत्रपती संभाजीनगर पश्चिममध्ये जप्त केले ४.८० लाख रुपये
छत्रपती संभाजीनगर पश्चिम मतदारसंघात बुधवारी सकाळी ए. एस. क्लब येथे स्थित सर्वेक्षण पथकाकडून वाहनांची कसून तपासणी सुरू असताना खासगी वाहनात ४ लाख ८० हजार रुपये मिळून आले. याबाबत संबंधिताकडे चौकशी केली असता त्याने घराचा व्यवहार करण्यासाठी पैसे असल्याचे सांगितले. मात्र त्याला पुरावा सादर करता आला नाही. त्यामुळे पथकाने त्याला पुरावा आणायला सांगत, पंचनामा करून रक्कम वरिष्ठ कोषागार कार्यालयात जमा केली.
