बिल्डर दिव्येश देलवाडिया यांना ग्राहकाने बजावली कायदेशीर नोटीस!; अर्धवट घर माथी मारल्याचे प्रकरण, आदेश न पाळणाऱ्याविरुद्ध ‘महारेरा’ काय ॲक्‍शन घेणार? 

छत्रपती संभाजीनगर (मेट्रोपोलिस पोस्ट वृत्तसेवा) : बालाजी बिल्डकॉनचा बिल्डर दिव्येश देलवाडिया यांच्यावर ग्राहकाने फसवणुकीचा आरोप केल्यानंतर आणि ‘महारेरा’नेही कामे पूर्ण करण्याचे आदेश देऊनही बिल्डरने अजूनही कामे पूर्ण केलीच नाही. त्यामुळे ग्राहकाने आता कायदेशीर नोटीस बिल्डरला बजावली आहे.

ग्राहक विजयकुमार गंगाधर दाभाडे (रा. संजयनगर, मुकुंदवाडी) यांनी बिल्डरकडून झालेल्या फसवणुकीची आपबिती मांडली होती. त्यांच्या तक्रारीनुसार, की शेंद्रा येथील बालाजी बिल्डकॉनच्या बिल्डर दिव्येश हरिभाऊ देलवाडिया यांच्या ४२ कॉपर स्टोन या रो हाऊस प्रकल्पातील ३० नंबरचे रो हाऊस त्यांनी खरेदी केले. बिल्डरने पूर्ण रक्कम घेऊन घराची ताबा पावती बनवून दिली. मात्र घरातील लाइट फिटिंग, प्लंबिंग, रंगाचे काम करून दिले नाही. याबाबत  वाभाडे यांनी बिल्डर देलवाडिया यांना अनेकवेळा संपर्क करून राहिलेले काम करून देण्याची विनंती केली.

मात्र बिल्डरने प्रतिसाद दिला नाही. अनेक वेळा सांगूनही काम करून दिले जात नसल्याने दाभाडे यांनी वकिलामार्फत कायदेशीर नोटीस पाठवून राहिलेले काम करून देण्याची विनंती केली. मात्र नोटिसीलाही बिल्डरने जुमानले नाही. त्यामुळे दाभाडे यांनी ‘महारेरा’कडे बिल्डरची तक्रार केली. त्यावर महारेराने बिल्डरला रो हाऊसची उरलेली कामे एक महिन्यात करून देण्याचे आदेश दिले. हा आदेश देऊन आता दीर्घ काळा लोटला आहे. त्‍यामुळे महारेरा आपला आदेश न मानणाऱ्यावर काय कारवाई करतो, याकडे सर्वांचे लक्ष लागले आहे.