आता दुपारीही दिल्लीसाठी भरा उड्डाण; छ. संभाजीनगरकरांसाठी एअर इंडियाचे तिसरे विमान!

By City News Desk

On 07 Oct 2025

आता दुपारीही दिल्लीसाठी भरा उड्डाण; छ. संभाजीनगरकरांसाठी एअर इंडियाचे तिसरे विमान!

"छत्रपती संभाजीनगर सिटी न्यूज' वेबसाईटवर प्रसिद्ध होणारा मजकूर, छायाचित्रे 'मेट्रोपोलिस पोस्ट' वृत्तपत्राच्या परवानगीशिवाय पूर्णतः किंवा अंशतः कॉपी करण्यास सक्त मनाई आहे. असे करताना कुणीही आढळल्यास कोणतीही वेगळी नोटीस न देता कायदेशीर कारवाई केली जाईल याची नोंद घ्यावी. - संपादक, मेट्रोपोलिस पोस्ट वृत्तपत्र

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगरकरांना आता देशाची राजधानी गाठणे आणखी सोयीस्कर होणार आहे. कारण, आजवर दिल्लीसाठी शहरातून सकाळ व संध्याकाळीच विमानसेवा होती. पण आता एअर इंडियाने छत्रपती संभाजीनगर येथून दुपारच्या वेळीही दिल्लीसाठी विमान उपलब्ध करून दिले आहे. २६ ऑक्‍टोबरपासून दुपारी ४.३० वाजता दिल्लीला विमानाने जाता येणार आहे.

विमान कंपन्यांचे हिवाळी सत्रासाठी २६ ऑक्टोबर २०२५ ते २८ मार्च २०२६ या कालावधीसाठीचे वेळापत्रक निश्चित झाले आहे. त्यानुसार आता छत्रपती संभाजीनगर येथून नवी दिल्लीसाठी दुपारच्या वेळेत एअर इंडियाचे विमान उपलब्ध होणार आहे. हे विमान दिल्लीहून दुपारी २ वाजता निघून ३.४० वाजता छत्रपती संभाजीनगर विमानतळावर येईल, तर येथून ४.३० वाजता उड्डाण घेऊन सायंकाळी ६.२० वाजता नवी दिल्ली येथे पोहोचेल, अशी माहिती एअर कनेक्टीव्हिटी एव्हीएशन ग्रुपचे अक्षय चाबुकस्वार यांनी दिली.

एवढेच नाही तर इंडिगो कंपनी यापूर्वी रद्द केलेले हैदराबादसाठीचे विमान पुन्हा सुरू करीत असून, फक्त हे विमान दररोजऐवजी आठवड्यातून तीन वेळा असेल. एअर इंडियाचे दिल्लीसाठीचे सकाळचे विमान १६४ आसनी, दुपारचे विमान १८२ आसनी तर इंडिगोचे संध्याकाळचे विमान १७६ आसनी राहणार आहे. या तिन्ही विमानात अनुक्रमे १३२, १७० आणि सर्व अशी इकॉनॉमी सिट्स उपलब्ध राहणार आहेत.