छ. संभाजीनगरमध्ये फिजिक्सवाला क्‍लासेसची मनमानी; विद्यार्थ्याला मानसिक त्रास, ग्राहक मंचाने मग उपटले कान..!

छत्रपती संभाजीनगर (सीएससीएन वृत्तसेवा) : मनमानी नियम लावून विद्यार्थ्याला छळणाऱ्या छत्रपती संभाजीनगरातील फिजिक्सवाला या खासगी क्‍लासेस चालकाचे जिल्हा ग्राहक तक्रार निवारण आयोगाने चांगलेच कान उपटले. पालकाने क्‍लासमध्ये भरलेल्या रकमेपैकी ४७ हजार ७३९ रुपये सात टक्के व्याजासह परत करण्याचे आदेश आयोगाच्या अध्यक्षा शिल्पा एस. डोल्हारकर, सदस्य गणेशकुमार आर. सेलूकर आणि जान्हवी भिडे यांनी दिले.

काय आहे प्रकरण…
आशिष धनश्यामदास वैष्णव (वय ४३, रा. श्रीकृष्णनगर सिडको) यांनी जिल्हा ग्राहक तक्रार निवारण आयोगाकडे तक्रार केली होती. त्‍यांचा मुलगा ओमने फिजिक्सवाला या खासगी क्‍लासमध्ये जेईई-२०२४ या दोन वर्षांच्या क्‍लाससाठी १७ एप्रिल २०२३ रोजी प्रवेश घेतला. दोन वर्षांचे त्‍याला ९६ हजार रुपये शुल्क सांगण्यात आले होते. पैकी ६३ हजार ७३९ रुपयांचा भरणा वैष्णव यांनी केला. ५ मे २०२३ रोजी क्‍लासेसला सुरुवात झाली असता त्‍याला सकाळऐवजी सायंकाळची बॅच देण्यात आली. ओमने सकाळच्या बॅचची मागणी केली होती. तसे क्‍लासेसवाल्यांनी प्रॉमिसही केले होते. मात्र मनमानी करून सायंकाळची बॅच देण्यात आली.

पैसे परत करण्यासही नकार…
वैष्णव यांनी भरलेले शुल्क परत मागितले असता पैसे देण्यासही क्‍लासेसवाल्यांनी नकार दिला. त्‍यामुळे अ‍ॅड. जी. के. बोरुडे यांच्यामार्फत वैष्णव यांनी जिल्हा ग्राहक मंचात तक्रार दिली. मंचाने क्‍लासेसच्या मनमानीला लगाम लावत दंड ठोठावला. वैष्णव यांना मानसिक व शारीरिक त्रासापोटी पाच हजार आणि तक्रार खर्चासाठी तीन हजार रुपये देण्याचेही आदेशात म्‍हटले आहे. ४५ दिवसांत क्‍लासेसवाल्यांनी पैसे दिले नाहीतर अतिरिक्‍त दोन टक्‍के व्याजाने रक्‍कम आकारण्यात येईल, असेही आदेशात म्‍हटले आहे.