वैजापूर (मेट्रोपोलिस पोस्ट वृत्तसेवा) : वैजापूरमध्ये एक आगळीवेगळी घटना समोर आली आहे. सामान्यतः गुन्हेगार एखाद्या व्यावसायिक किंवा उद्योजकाचे, अधिकाऱ्याचे किंवा त्यांच्या नातेवाइकाचे अपहरण करून मोठी खंडणीची रक्कम मागतात. मात्र वैजापूरमध्ये खंडणीखोरांनी केले एका मजुराचे अपहरण... आता मजुराचे अपहरण केल्यावर खंडणी मिळणार ती किती... मग त्यांनी त्याच्या कुटुंबीयांकडे १५ हजार रुपयांची मागणी केली. पोलिसांनी त्यांना अवघ्या २४ तासांत अटक केली आहे.
शिवम सुभाष सुरडकर (वय ३१, रा. बडी मस्जिद, वैजापूर), सचिन बाळू गोरे (वय २९, रा. मसनखाई, वैजापूर) असे अटक केलेल्या खंडणीखोरांची नावे असून, त्यांचा तिसरा साथीदार सचिन मुरलीधर पवार (रा. खंडोबानगर, वैजापूर) फरारी झाला आहे. पोलीस सूत्रांच्या माहितीनुसार, वैजापूर न्यायालयाच्या नवीन इमारतीच्या बांधकाम सुरू असून, तिथे इम्रान अलीम अन्सारी (वय १९) हा मजुरी करतो. तो झगडा फाट्यावर गुरुवारी (५ मार्च) सायंकाळी मासे घेण्यासाठी आला असता परतताना रात्री आठच्या सुमारास दुचाकीवरून आलेल्या तिघांनी त्याचे अपहरण केले. नंतर मोबाइलवरून त्याच्या कुटुंबीयांना १५ हजारांची खंडणी मागितली. खंडणी न मिळाल्याने त्यांनी इम्रानला मारहाण करून त्याच्याकडील दोन हजारांचा मोबाइल, ३ हजारांची चांदीची साखळी, १ हजाराचे डिजिटल घड्याळ आणि रोख ३०० रुपये असा एकूण ६ हजार ३०० रुपयांचा मुद्देमाल हिसकावला आणि मध्यरात्री १२ वाजता त्याला डवाळा फाट्यावर सोडून पळून गेले.
इम्रानने वैजापूर पोलिसांत धाव घेऊन तक्रार दिली. त्यावरून तिघांविरुद्ध अपहरण, मारहाण व खंडणी गुन्हा दाखल झाला. पोलिसांनी शहर व परिसरातील सीसीटीव्ही तपासून खंडणीखोरांची ओळख पटवली. नंतर त्यांचा शोध सुरू केला. शिवम सुरडकर, सचिन गोरे यांना जेरबंद केले तर सचिन पवार फरारी होण्यात यशस्वी झाला. ही कारवाई पोलीस निरीक्षक सत्यजित ताईतवाले यांच्या मार्गदर्शनाखाली सहायक पोलीस निरीक्षक विजय देशमुख, पोलीस उपनिरीक्षक एकनाथ नागरगोजे, योगेश तरमाळे, अमोल कांबळे, अभिजित डहाळे, प्रशांत गिते, सचिन रत्नपारखे, उमेश जमदाडे अजित नाचण, कैलास चव्हाण यांच्या पथकाने केली.
.jpg)
.jpg)
