१६ नोव्हेंबरच्या मुहूर्तावर राजू शिंदे यांची भाजपमध्ये होणार घरवापसी!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : वैजापूरमध्ये आ. रमेश बोरनारे यांनी भाजप फोडून स्थानिक पदाधिकाऱ्यांना शिंदे गटात घ्यायला सुरुवात केली आहे, दुसरीकडे सिल्‍लोडमध्ये आ. अब्दुल सत्तार यांनी नगरपालिका निवडणुकीत भाजपला सोबत न घेण्याचा निर्णय घेतला आहे. त्यामुळे भाजपच्या स्थानिक पदाधिकाऱ्यांनीही आता एक पाऊल पुढे टाकत मंत्री संजय शिरसाटांना विधानसभा निवडणुकीत आव्हान देणाऱ्या राजू शिंदे यांना पुन्हा पक्षात प्रवेश देण्याचा निर्णय घेतल्याचे दिसत आहे. १६ नोव्हेंबरला राजू शिंदे हे प्रदेशाध्यक्ष रवींद्र चव्हाण यांच्या उपस्थितीत घरवापसी करणार असल्याचे सांगण्यात येत आहे.

गेल्या विधानसभा निवडणुकीत पश्चिम मतदारसंघाची जागा शिंदे गटाला सुटल्याने भाजपच्या राजू शिंदे यांनी ठाकरे गटात प्रवेश करत उमेदवारी मिळवली होती. संजय शिरसाट यांना आव्हान देत ते मैदानात उतरले होते. मात्र त्यांचा पराभव झाला होता. राजू शिंदे यांच्यासोबत सिल्लोडमध्ये सुरेश बनकर, वैजापूरमध्ये दिनेश परदेशी यांनीही ऐन निवडणुकीच्या तोंडावर उमेदवारीसाठी भाजप सोडून ठाकरे गट गाठला होता.

उमेदवारीही मिळवली होती. मात्र तिघांचाही पराभव झाल्याने यापूर्वीच बनकर आणि परदेशी हे भाजपमध्ये परतले आहेत. राजू शिंदे यांना परत घेण्यास मात्र स्थानिक पदाधिकाऱ्यांचा विरोध होता, असे सांगण्यात येते. मात्र अलीकडच्या काळात शिंदे गटाचे आमदार ज्या पद्धतीने भाजपच्या स्थानिक पदाधिकाऱ्यांशी वागत आहेत, एव्हाना थेट काही पदाधिकारीच फोडून शिंदे गटात घेत आहेत, ते पाहता स्थानिक पदाधिकाऱ्यांनीही राजू शिंदे यांना विरोध कमी केला आहे. यामुळे राजू शिंदे यांचा भाजपमध्ये परतण्याचा मार्ग मोकळा झाल्याचे बोलले जात आहे. एका वृत्तपत्राशी बोलताना राजू शिंदे यांनी आपल्या संभाव्य भाजप प्रवेशाला दुजोराही दिला आहे.