मनसे-ठाकरे गट युती होताच, हिंदुत्वाच्या मुद्द्यावर जिल्हाध्यक्ष सुमित खांबेकर शिंदे गटात, सूरडकर-गौडा भाजपमध्ये!

छत्रपती संभाजीनगर (मेट्रोपोलिस पोस्ट वृत्तसेवा) : ठाकरे गट आणि मनसेची युती झाल्याची घोषणा मुंबईत उद्धव ठाकरे आणि राज ठाकरे यांनी केली. त्याचे पडसाद लगेचच छत्रपती संभाजीनगर शहरात उमटले. सध्या ठाकरे गटाने कट्टर हिंदुत्वाची कास सोडलेली असल्याने स्थानिक मनसैनिकांची चलबिचल सुरू झाली असून, त्यांनी कट्टर हिंदुत्व जोपासण्यासाठी शिंदे गट आणि भाजपची वाट धरली. शहर जिल्हाध्यक्ष सुमित खांबेकर यांनी बुधवारी (२४ डिसेंबर) मुंबईत उपमुख्यमंत्री एकनाथ शिंदे यांच्या उपस्थितीत शिंदे गटात प्रवेश केला, तर शहराध्यक्ष आशिष सुरडकर आणि गजन गौडा यांनी भाजपमध्ये प्रवेश केल्याने राजकीय वर्तुळात खळबळ उडाली आहे.

कोणतीही भूमिका ठामपणे पुढे नेण्यास मनसे नेहमीच अपयशी राहिल्याची टीका होत असते. त्यांच्या या धरसोड वृत्तीचा परिणाम कार्यकर्त्यांवरही होत असतो. कधीकाळी भाजपला पदाधिकाऱ्यांचाच पक्ष म्हटले जायचे. आता भाजप क्र. १ चा पक्ष बनला आहे. मात्र कधीकाळी कार्यकर्त्यांचा मोठे जाळे असलेला मनसे पक्ष आता पदाधिकाऱ्यांचाच उरला आहे. व्यावसायिक हित जपण्यासाठी अनेक जण मनसेची मोठी पदे ग्रहण करून असल्याची टीका छोटे पदाधिकारी व्यक्त करत असतात. खांबेकर यांनी अचानक शिंदे गटात प्रवेश केल्याने शहरातील अनेक पदाधिकारी आता शिंदे गट किंवा भाजपमध्ये जातील, अशी शक्यता व्यक्त होत आहे.

खांबेकरांच्या प्रवेशावेळी मंत्री संजय शिरसाट उपस्थित होते. त्यांच्याशिवाय मनसेचे पूर्व विभाग शहराध्यक्ष आशिष सुरडकर आणि गजन गौडा यांनीही बुधवारी भाजपमध्ये प्रवेश केला. त्यांच्यासोबत शहर उपाध्यक्ष प्रशांत आटोळे, शहर सचिव सागर राजपूत, शहर उपाध्यक्ष रामकृष्ण मोरे, शहर जिल्हा चिटणीस विशाल वैद्य, शहर उपाध्यक्ष अमित दायमा, मंदार देसाई, दत्ता भुतेकर, रितेश देवरे, प्रल्हाद लहिरे, सचिन दाभाडे यांनीही भाजपमध्ये प्रवेश केला. एकूणच आता मनसेतून छोटे पदाधिकारीही बाहेर पडले असून, केवळ मोठे पदाधिकारी उरले आहेत.