छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर महापालिका निवडणुकीत युती होईल की नाही, याबद्दल आता दाट शंका निर्माण झाली आहे. कारण ज्याप्रमाणे शिंदे गटाचे मंत्री संजय शिरसाट यांनी सकारात्मक प्रस्ताव आला तरच युती होईल, अशी स्पष्टोक्ती केली. त्याच शब्दांत मंत्री अतुल सावे यांनीही तडजोडीला स्पष्ट नकार दिला आहे. आम्ही चार वेगवेगळे प्रस्ताव दिले, पण त्यांचे समाधान होत नाही. आमचीही स्वबळावर लढण्याची पूर्ण तयारी आहे, असे सावे म्हणाले. उमेदवारी भरायला अवघे काही तास उरले असताना भाजप- शिंदे गटातील पेच कमी होण्याऐवजी वाढतच चालल्याने इच्छुकांचे मात्र अवसान गळाले आहे.
आज, २९ डिसेंबरला सकाळी भाजपचे शहराध्यक्ष किशोर शितोळे, आमदार संजय केणेकर आणि समीर राजूरकर यांनी पुन्हा मंत्री संजय शिरसाट यांच्या निवासस्थानी जाऊन त्यांची भेट घेतली. नवीन आणि अंतिम प्रस्ताव भाजपकडून देण्यात आला. याबद्दल मंत्री सावे म्हणाले, की आज सायंकाळपर्यंत वाट पाहू. अंतिम प्रस्तावही शिंदे गटाला अमान्य असल्यास आम्हीही स्वबळावर लढण्यास तयार आहोत. युती तोडण्याचा निर्णय त्यांच्याकडून होत असल्याचे सावे म्हणाले. शेवटच्या प्रस्तावावरही शिंदे गटाने सकारात्मक निर्णय घेतला नाही तर आम्ही निर्णय घेऊ, असे आ. केणेकर यांनीही स्पष्ट केले. शिंदे गटाने ४१ जागा मागितल्या आहेत. त्यावर शिंदे गट तडजोड करायला तयार नाही. मंत्री शिरसाट यांनीही पत्रकारांशी बोलताना अप्रत्यक्षरित्या स्वबळाचाच इशारा भाजपला दिला आहे. त्यामुळे वरिष्ठ स्तरावरून काय निर्णय होतो, याकडे स्थानिक पदाधिकाऱ्यांचे लक्ष लागले आहे. आज रात्री उशिरापर्यंत युतीवर शिक्कामोर्तब होईल किंवा युती तुटेल, अशी शक्यता आहे.
.jpg)
.jpg)
.jpg)
1.jpg)
.jpg)
