सिल्लोड (मेट्रोपोलिस पोस्ट वृत्तसेवा) : बिबट्या तरुणावर झडप घालणार असल्याचे पाहून दोन पाळीव कुत्र्यांनी भुंकून आधी बिबट्याचे लक्ष आपल्याकडे वळवले आणि त्वेषाने हल्ला केला. बिबट्या आणि दोन कुत्र्यांची झुंज सुरू झाली. तरुणाने घाबरून आरडाओरड सुरू केली. त्यामुळे बिबट्याने एका कुत्र्याला जखमी करत दुसऱ्या कुत्र्याला झाडावर घेऊन गेला. यात कुत्रा झाडावरून विहिरीत पडला आणि मृत्यूमुखी पडला. त्यानंतर बिबट्याने पळ काढला... हा थरार प्रसंग सिल्लोड तालुक्यातील उंडणगाव शिवारात शनिवारी (२२ नोव्हेंबर) सकाळी घडला.
सुनील नरवडे (रा. उंडणगाव) याने आपल्यावर गुदरलेल्या प्रसंगाची आणि कुत्र्यांच्या साहसाची कहानी सांगितली. तो नीलेश महाजन यांच्या केळीच्या बागेत काम करत होता. त्याचवेळी बिबट्याने त्याच्यावर झडप घालण्याची तयारी केली होती. तो सुनीलच्या दिशेने पुढे येत असतानाच ही बाब २ पाळीव कुत्र्यांच्या लक्षात आली. त्यांनी लगेचच भुंकून बिबट्याचे लक्ष आपल्याकडे वेधले. त्यामुळे सुनील सावध झाला. बिबट्याने मग कुत्र्यांशी आधी निपटण्याचा निर्णय घेतला. दोन्ही कुत्रेही कमी नव्हते, तेही त्वेषाने बिबट्यावर चालून गेले.
बिबट्या आणि कुत्र्यांची झुंज सुरू होताच तरुणाने आरडाओरड सुरू केल्याने बिथरलेल्या बिबट्याने एका कुत्र्याला जखमी केले, तर दुसऱ्याला झाडावर घेऊन गेला आणि तिथून कुत्र्याला सोडत उडी घेत पळून गेला. कुत्रा थेट खालील विहिरीत पडून मृत्यूमुखी पडला. सुनील सांगतो, की कुत्र्यामुळे बिबट्याने माझ्यावरचे लक्ष काढून कुत्र्यांकडे वळवले. त्यामुळे मी वाचलो. कुत्र्यांचे साहस पाहून मीही थक्क झालो. ते अत्यंत आक्रमकपणे बिबट्यावर तुटून पडले होते. छत्रपती संभाजीनगर जिल्ह्यात बिबट्याचे हल्ले दिवसेंदिवस वाढले असून, वनविभागाने उपाययोजना करण्याची गरज निर्माण झाली आहे. उंडणगावमधील शेतकरी या घटनेने हादरले असून, त्यांची शेतात एकट्याने जाण्याची आता हिंमत होत नाहीये.
मांडव्यातही शेतकऱ्यावर बिबट्याचा हल्लागंगापूर तालुक्यातील वाळूजजवळील मांडवा शिवारात पिकाला पाणी देण्यासाठी शेतात आलेल्या शेतकऱ्यावर बिबट्याने हल्ला केला. शेतकऱ्याने आरडाओरड केल्याने पळून गेला. संदीप पुरुषोत्तम विधाते (वय ३८, रा. तांदूळवाडी मांडवा, शिंदे वस्ती) असे हल्ला झालेल्या शेतकऱ्याचे नाव आहे. ही घटना शुक्रवारी (२१ नोव्हेंबर) सकाळी घडली. या भागात २ महिन्यांपासून मादी बिबट्या आणि तिच्या दोन बछड्यांचा वावर आहे. मात्र वनविभागाचे दुर्लक्ष होत असल्याने शेतकऱ्यांचा जीव धोक्यात आला आहे.
.jpg)
.jpeg)
.jpg)
