लावणी नृत्याचा सीन देताना श्रद्धा कपूरचा पाय फ्रॅक्चर, ‘इथा’चे शूटिंग दोन आठवडे लांबले!

अभिनेत्री श्रद्धा कपूर सध्या ‘इथा' या बायोपिकवर काम करत आहे. या चित्रपटाच्या सेटवर लावणी नृत्याचा सीन देताना श्रद्धाचा डावा पाय फ्रॅक्चर झाला आहे. हा चित्रपट प्रसिद्ध लावणीसम्राज्ञी विठाबाई नारायणगावकर यांच्यावर आयुष्यावर आधारित आहे. श्रद्धा ही विठाबाईंची भूमिका साकारत असून, श्रद्धाच्या अपघातामुळे शूटिंग दोन आठवड्यांसाठी थांबवण्यात आले आहे.

श्रद्धा कपूरने या महिन्याच्या सुरुवातीला नाशिकजवळील औंधेवाडी येथे चित्रपटाचे शूटिंग सुरू केले होते. श्रद्धाने विठाबाईंच्या भूमिकेत शिरण्यासाठी १५ किलो वजनही वाढवले आहे. घटनेबाबत सांगितले, की श्रद्धाने चमकदार नववारी साडी, जड दागिने आणि कंबरेचा पट्टा घातला होता. ती पूर्ण उर्जेने लावणी नाचत होती. एका डान्स स्टेप दरम्यान श्रद्धाचे सर्व वजन एका पायावर गेले आणि तिचा तोल गेला. त्यामुळे ती पडली आणि तिच्या डाव्या पायाला फ्रॅक्चर झाले. वृत्तानुसार, घटनेनंतर लगेचच चित्रपटाचे दिग्दर्शक लक्ष्मण उतेकर यांनी नाशिकचे शेड्युल रद्द केले. असे वृत्त आहे की श्रद्धाला शूटिंगचे दिवस वाया घालवायचे नव्हते, म्हणून तिने टीमला तिचे क्लोज-अप सीन पुन्हा शेड्यूल करून शूट करण्याचा सल्ला दिला.
पायाचे दुखणे वाढले...
मुंबईला परतल्यानंतर तिने मड आयलंड सेटवर पुन्हा शूटिंग सुरू केले. श्रद्धाने तेथे काही भावनिक दृश्ये शूट केली, परंतु काही दिवसांनी तिच्या वेदना वाढल्या आणि शूटिंग थांबवावे लागले. शूटिंग दोन आठवड्यांसाठी थांबवण्यात आले आहे. श्रद्धा शेवटची २०२४ च्या ‘स्त्री २' चित्रपटात दिसली होती.