कर्ज घेतले भरमसाठ अन् फेडण्याच्या नावाने बोंब; खुलताबादच्या कोहिनूर कॉलेजची बिल्डिंग सील!; अडीच हजारांवर विद्यार्थ्यांचे काय होणार?

खुलताबाद (मेट्रोपोलिस पोस्ट वृत्तपत्राच्या सौजन्याने) : संस्थेची मालमत्ता गहाण ठेवून इमारत नुतनीकरणासाठी कर्ज उचलून नंतर या कर्जाची परतफेड न करणे कोहिनूर शिक्षण संस्थेला महागात पडले आहे. वित्तीय संस्थेने जिल्हा न्यायालयात धाव घेतली. न्यायालयाच्या आदेशाने या शिक्षण संस्थेची खुलताबाद येथील तीन मजली इमारत रविवारी (१२ ऑक्‍टोबर) सील करण्यात आली. दोन कोटी ८२  लाख ८६ हजार २५४ रुपयांचे कर्ज थकल्याने ही कारवाई करण्यात आली.

कॉँग्रेसचे दिवंगत शहराध्यक्ष इद्रिस खान यांचे चिरंजीव मजहर खान अध्यक्ष असलेल्या कोहिनूर शिक्षण संस्थेची खुलताबाद तालुक्यातील शुलिभंजन येथे तीन मजली इमारत आहे. या इमारतीच्या नुतनीकरणासाठी मजहर खान व त्यांच्या पत्नी तथा संस्थेच्या सचिव अस्मा मजहर खान यांनी संस्थेची कागदपत्रे गहाण ठेवत २९ सप्टेंबर २०२२ रोजी चोला मंडलम या खासगी वित्तीय संस्थेकडून २ कोटी ९४ लाख २० हजार ३९९ रुपयांचे कर्ज उचलले होते. या कर्जाच्या परतफेडीसाठी ४ लाख २२ हजार ९७ रुपयांचा हफ्ता ठरला होता.

मात्र, काही हफ्ते दिल्यानंतर संस्थेने परतफेड बंद केली. यामुळे २ कोटी ८२ लाख ८६ हजार २५४ रुपये थकले. वित्तीय संस्थेने ‘कोहिनूर'ला वारंवार स्मरणपत्रे दिली. मात्र, खान कुटुंब त्याकडे लक्ष देत नव्हते. अखेर चोला मंडलमने जिल्हा सत्र न्यायालयात धाव घेतली. तेथे संस्थेच्या विधी सल्लागार अॅड. सागर लाड यांनी चोला मंडलमची बाजू मांडली. काही सुनावण्या झाल्यानंतर अखेर न्यायालयाने ‘कोहिनूर'ची तीन मजली इमारत जप्त करण्याचे आदेश दिले. 

२३५२ विद्यार्थ्यांचे भवितव्य अंधारात
‘कोहिनूर'च्या महाविद्यालयात कला, वाणिज्य व विज्ञान शाखेचे अकरावी ते पदव्युत्तर पदवी असे विविध वर्ग चालतात. यात सर्व मिळून २,३५२ विद्यार्थी शिक्षण घेतात, तर महाविद्यालयात प्राचार्य, ७२ प्राध्यापक आणि अन्य कर्मचारी कार्यरत आहेत. आता महाविद्यालयाची इमारत जप्त झाल्याने या विद्यार्थ्यांच्या शैक्षणिक भवितव्याचा प्रश्न निर्माण झाल्याने पालक चिंताग्रस्त झाले आहेत. दरम्यान, याबाबत बोलताना महाविद्यालयाच्या प्राचार्या शेख कमरूनीसा बेग यांनी सांगितले की, झालेल्या कारवाईबाबत डॉ. बाबासाहेब आंबेडकर विद्यापीठाचे प्रशासन, शिक्षण सहसंचालक, धर्मादाय आयुक्त यांना माहिती कळवली जाईल. यानंतर पुढे काय करायचे ते ठरवले जाईल.

मात्र, विद्यार्थ्यांचे शैक्षणिक नुकसान होऊ दिले जाणार नाही. वेळ पडल्यास महाविद्यालयाच्या प्रांगणात वर्ग भरवून अभ्यासक्रम पूर्ण केला जाईल. दुसरीकडे सूत्रांनी दिलेल्या माहितीनुसार, कोहिनूर शिक्षण संस्थेवर झालेल्या कारवाईच्या अनुषंगाने आज (१३ ऑक्‍टोबर) डॉ. बाबासाहेब आंबेडकर मराठवाडा विद्यापीठात विशेष बैठक घेतली जाणार आहे.बैठकीत विद्यार्थ्यांचे शैक्षणिक नुकसान टाळण्यासह अन्य करावयाच्या उपाययोजनांवर चर्चा होईल.