गंगापूर (मेट्रोपोलिस पोस्ट वृत्तसेवा) : गंगापूर तालुक्यातील बोलेगाव शिवारातील वाबळे वस्तीवर बुधवारी (७ जानेवारी) मध्यरात्रीनंतर दरोडा पडला. शेतकरी कुटुंबास धारदार शस्त्राचा धाक दाखवून दरोडेखोरांनी रोख रक्कम, सोन्याचे दागिने असा २ लाखांचा ऐवज चोरून नेला होता. या दरोड्यातील दोन दरोडेखोर छत्रपती संभाजीनगर ग्रामीण पोलिसांच्या स्थानिक गुन्हे शाखेच्या हाती लागले असून, आज, ९ जानेवारीला पहाटे गंगापूर ते भेंडाळा फाटा रोडवरील बाबरगाव फाट्यावर त्यांच्या मुसक्या आवळण्यात आल्या.
कुलत्या बंडू भोसले (वय २५, रा. बाबरगाव ता. गंगापूर) व गोरख ड्रायव्हर चव्हाण (वय ३२, रा. बाबरगाव ता. गंगापूर) अशी पकडण्यात आलेल्या दरोडेखोरांची नावे आहेत. ८ जानेवारीला शेतकरी आबासाहेब दत्तात्रय वाबळे (वय ४५, रा. बोलेगाव, वाबळे वस्ती ता. गंगापूर) यांनी गंगापूर पोलीस ठाण्यात दिलेल्या तक्रारीवरून दरोड्याचा गुन्हा दाखल करण्यात आला होता. या गुन्ह्याच्या अनुषंगाने पोलीस अधीक्षक डॉ. विनयकुमार राठोड व अप्पर पोलीस अधीक्षक अन्नपूर्णा सिंह यांच्या मार्गदर्शनाखाली स्थानिक गुन्हे शाखेचे पोलीस निरीक्षक विजयसिंह राजपूत हे या गुन्ह्याचा समांतर तपास करत होते. गंगापूर, वैजापूर, अहिल्यानगर भागातून गोपनीय बातमीदारांमार्फत माहिती काढत होते.
गोपनीय बातमीदारामार्फत माहिती मिळाली की, हा गुन्हा गोरख ड्रायव्हर चव्हाण, कुलत्या बंडू भोसले यांनी साथीदारांसोबत मिळून केला आहे. पोलीस निरीक्षक राजपूत व त्यांच्या सहकाऱ्यांनी दोघांचा शोध सुरू केला. आज, ९ जानेवारीला पहाटे माहिती मिळाली की, गोरख व कुलत्या हे गंगापूर ते भेंडाळा फाटा रोडवरील बाबरगाव फाटा येथे आहेत. पथकाने लगेचच तिथे धाव घेतली. फाट्यावर झाडाखाली दोघे मिळून आले. त्यांनी दरोड्याची कबुली दिली. दरोड्यात नगदी पैसे व सोन्याचे दागिने चोरून नेले व आपसात वाटून घेतल्याचे सांगितले. त्यांनी यापूर्वीही ३ गुन्हे गंगापूर पोलीस ठाण्याच्या हद्दीत केल्याचे समोर आले.
गुन्ह्यातील चोरलेले व त्यांच्या वाट्याला आलेले एकूण १ लाख रुपयांचे सोन्याचे दागिने व रोख रक्कम पोलिसांनी जप्त केली. दोघांना गंगापूर पोलिसांच्या ताब्यात देण्यात आले. ही कामगिरी पोलीस अधीक्षक डॉ. विनयकुमार राठोड, अप्पर पोलीस अधीक्षक अन्नपूर्णा सिंह यांच्या मार्गदर्शनाखील स्थानिक गुन्हे शाखेचे पोलीस निरीक्षक विजयसिंह राजपूत, पोलीस उपनिरीक्षक महेश घुगे, पोलीस अंमलदार कासीम शेख, प्रमोद पाटील, सचिन राठोड, सुनिल गोरे, पोलीस अंमलदार बलविरसिंग बहुरे, योगेश तरमळे, जिवन घोलप, शिवाजी मगर यांनी केली.
.jpg)
