सिल्लोड (मेट्रोपोलिस पोस्ट वृत्तपत्राच्या सौजन्याने) : सिल्लोडचे आमदार अब्दुल सत्तार आणि जालन्याचे माजी खासदार रावसाहेब दानवे यांच्यातील भांडण सर्वश्रुत आहे. लोकसभा आणि विधानसभा निवडणुकीत हे भांडण पार टोकाला गेले होते. लोकसभा निवडणुकीत दानवेंच्या पराभवात आपला हात असल्याची कबुली खुद्द सत्तारांनी दिली होती. त्यानंतर विधानसभा निवडणुकीत सत्तारांच्या तोंडाला फेस आणण्याचे काम रावसाहेब दानवेंनी केले. सत्तारांचा निसटता विजय झाला. सध्या सत्तार मंत्रिमंडळात नाहीत. त्यामुळे त्यांचा जोर काहीसा ओसरल्याचे मतदारसंघात दिसून येत आहे. प्रसारमाध्यमांतही त्यांची चर्चा फार होत नाही. याचा फायदा उचलून रावसाहेब दानवे यांनी सिल्लोडकडे अधिक लक्ष द्यायला सुरुवात केली आहे.
गेल्या काही दिवसांत सिल्लोड तालुक्यात झालेल्या अतिवृष्टीमुळे पिकांचे अतोनात नुकसान झाले आहे. रावसाहेब दानवे यांनी शनिवारी (२० सप्टेंबर) सकाळी ११ ला तालुक्यात पाहणी करून शेतकऱ्यांना जास्तीत जास्त मदत मिळवून देण्याचे आश्वासन दिले. चारनेर, चारनेरवाडी, आधारवाडी, पिंपळगाव घाट, धावडा, देऊळगाववाडी, देऊळगाव बाजार, सावखेडा, बोरगाव बाजार, बोरगाव सारवानी आदी गावांत अतिवृष्टीमुळे झालेल्या नुकसानाची दानवे यांनी शेतकऱ्यांच्या बांधावर जाऊन पाहणी केली.
अनेक ठिकाणी घरांचेही नुकसान झाले असून, याबाबतचे योग्य पंचनामे कोणताही शेतकरी नुकसानभरपाईपासून वंचित राहता कामा नये, यासाठी चावडीवर वाचन करण्याच्या सूचना त्यांनी महसूल प्रशासनाला केल्या. तुटलेले रस्ते, खचलेली बांधकामे यांचीही लवकरात लवकर पुनर्बांधणी करण्याचे आश्वासन त्यांनी दिले. त्यांच्यासोबत माजी आमदार सांडू पाटील लोखंडे, भाजपा प्रदेश सचिव सुरेश बनकर, इद्रिस मुलतानी, जिल्हा सचिव कमलेश कटारिया, सुनील मिरकर, अशोक गरुड, मकरंद कोर्डे, दिलीप दानेकर, विजय वानखेडे, चंद्रशेखर साळवे, मंडळ अध्यक्ष एकनाथ हिवाळे यांच्यासह पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.
.jpg)
.jpg)
