फुलंब्री (मेट्रोपोलिस पोस्ट वृत्तसेवा) : कर्जबाजारीपणाला कंटाळून शेतकऱ्याने गळफास घेऊन आत्महत्या केली. ही दुर्दैवी घटना वाणेगाव (ता. फुलंब्री) शिवारात बुधवारी (१७ डिसेंबर) सकाळी ११:३० च्या सुमारास समोर आली.
ज्ञानेश्वर भुजंगराव क्षीरसागर (वय ३६, रा. रेलगाव, ता. फुलंब्री) असे मृत्यू झालेल्याचे नाव आहे. ज्ञानेश्वर यांच्यासह तीन भावांत सव्वादोन एकर शेती असून, त्यांच्यावर खासगी कर्जाचा मोठा बोजा होता. सततची नापिकी आणि वाढत गेलेला कर्जाचा डोंगर यामुळे ज्ञानेश्वर चिंतित होते. यातूनच त्यांनी त्यांच्या वाणेगाव शिवारातील गट नंबर २२७ मधील शेतात लिंबाच्या झाडास गळफास घेत आत्महत्या केली. ही बाब काही शेतकऱ्यांच्या लक्षात येताच त्यांनी ज्ञानेश्वर यांना फासावरून काढून फुलंब्री ग्रामीण रुग्णालयात आणले. मात्र डॉक्टरांनी तपासून मृत घोषित केले.
पिशोरमध्ये वृद्धाची आत्महत्याकन्नड तालुक्यातील पिशोर येथील शफेपूर परिसरात ६० वर्षीय भीमराव येसूबा मोकासे यांनी राहत्या घरात गळफास घेऊन आत्महत्या केली. ही घटना बुधवारी (१७ डिसेंबर) दुपारी सव्वाच्या सुमारास समोर आली. त्यांच्या आत्महत्येचे कारण अद्याप समोर आलेले नाही. त्यांच्यावर सायंकाळी पाचला अंत्यसंस्कार करण्यात आले. त्यांच्या पश्चात पत्नी, मुलगा, सून, नातू असा परिवार आहे.
अतिवृष्टीमुळे आर्थिक विवंचनेतवैजापूर तालुक्यातील पिंपळगाव (खं.) येथे मंगळवारी (१६ डिसेंबर) दुपारी पोपट सर्जेराव काटे (वय ४०) या शेतकऱ्याने नायलॉन दोरीने गळफास घेऊन आत्महत्या केली. अतिवृष्टीमुळे शेतातील पिकांचे नुकसान झाल्याने ते चिंतित होते. त्यांच्यावर बँकेचे पिक कर्ज, सहकारी संस्था तसेच खासगी सावकाराचे कर्ज होते. त्यांनी राहत्या घरी गळफास घेतला. सायंकाळी ही घटना समोर येताच कुटुंबीयांनी शिऊर येथील प्राथमिक आरोग्य केंद्रात आणले. मात्र डॉक्टरांनी तपासून मृत घोषित केले. घटनेची नोंद शिऊर पोलिसांनी घेतली आहे. काटे यांच्या पश्चात आई, पत्नी, दोन मुली, मुलगा असा परिवार आहे.
.jpg)
