छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगरमध्ये अवैध गर्भपात रॅकेट चालवणाऱ्या टोळीची पाळेमुळे खोदणे सध्या सिडको एमआयडीसी पोलिसांकडून सुरू आहे. शनिवारी (१४ मार्च) महापालिका रुग्णालयातील कंत्राटी कर्मचारी शंकर आढाव (वय २७) याला अटक केली आहे. तो महापालिका रुग्णालयात नियमित तपासणीसाठी येणाऱ्या गर्भवती महिलांची माहिती पुरवायचा, गर्भवती किंवा तिच्या कुटुंबाला गर्भलिंगनिदानाबाबत विचारणा करायचा. कुटुंब तयार झाले, की टोळीप्रमुख डॉ. संतोष सोनवणेशी संपर्क घडवून आणायचा...
नारेगावमध्ये टोळीने पाच महिन्यांची गर्भवती असलेल्या २६ वर्षीय विवाहितेचा गर्भपात ६ मार्चला रात्री घडवला. त्याचवेळी विवाहितेच्या वडिलांनी पोलिसांसह येऊन धडक दिली होती. त्यावेळी गर्भपात करणारी टोळी पळून गेली होती. पोलिसांनी विवाहितेचा पती अरबाज फेरोज सय्यद, सासू आशिया फेरोज सय्यद, सासरे फेरोज मन्सूर सय्यद (सर्व रा. बलूच गल्ली, नारेगाव) यांना अटक केली होती. सध्या तिघेही १७ मार्चपर्यंत पोलीस कोठडीत असून, त्यांची पोलीस निरीक्षक सोमनाथ जाधव, सहायक पोलीस निरीक्षक कैलास लहाने यांच्याकडून कसून चौकशी सुरू आहे. चौकशीत त्यांनी गर्भपात करणाऱ्यांची नावे सांगितली.
त्यात मराठवाड्यात अनेक वर्षांपासून अवैध गर्भपाताचे रॅकेट चालवणारा डॉ. संतोष सोनवणे, जालन्यातील परिचारिका कमळ गोकुळ तिनगोटे, मयूरपार्क येथील फेबो डोमेस्ट महालॅब चालक अनिल जाधव (सपकाळ) यांनी हा गर्भपात केल्याचे समोर आले. कुख्यात डॉ. सोनवणेचे गर्भपात रॅकेट छत्रपती संभाजीनगरसह जालना, बीडपर्यंत पोहोचलेले आहे. गर्भलिंगनिदान करून देण्यापासून तर गर्भपात करवून देण्यापर्यंतची सुपारी तो ३ ते ५ लाख रुपयांपर्यंत घेतो. यापूर्वीही डॉ. सोनवणेला अनेकदा अटक झाली आहे. जामिनावर सुटून बाहेर पडला, की तो पुन्हा सक्रीय होतो. एमबीबीएस असलेल्या डॉ. सोनवणेने तामिळनाडूतून रेडिओलॉजीचे शिक्षण घेतले आहे.
अरबाजला कसे गाठले?डॉ. सोनवणेच्या संपर्कात अरबाज सय्यद कसा आला, हेही चौकशीतून समोर आले आहे. तो आपल्या २६ वर्षीय गर्भवती पत्नीला नियमित चाचणीसाठी नारेगावच्या मनपा रुग्णालयात घेऊन जायचा. तेथे कंत्राटी कर्मचारी शंकरसोबत त्याची ओळख झाली. दोघांमध्ये गर्भलिंगनिदानाबाबत चर्चा झाली. शंकरने पुढाकार घेत त्याला त्यासाठी महालॅब चालक अनिल जाधवला भेटवले. त्यानंतर अरबाजचा संपर्क डॉ. सोनवणेशी करून देण्यात आला. शंकरच या कृत्याची मूळ कडी असल्याचे समोर येताच त्याला सहायक पोलिस निरीक्षक कैलास लहाने यांनी अटक केली. अनिल जाधव (सपकाळ) याच्या पत्नीला या महालॅबचे कंत्राट मिळाले आहे. मात्र, त्याची सर्व कामे अनिलच करतो. मनपाच्या नारेगावच्या रुग्णालयातील चाचणीचे कामही जाधवच्या पत्नीच्या लॅबकडेच होते. अनिलने शंकरला गर्भवती महिलांची माहिती देणे, गर्भलिंगनिदानासाठी विचारणा करून तयार करणे अशी कामे सोपवली होती. या कामासाठी शंकरला टक्केवारीवर पैसे मिळायचे.
म्होरक्या अन् टोळी अद्याप फरारीच...टोळीप्रमुख डॉ. संतोष सोनवणेसह लॅबचालक अनिल जाधव, परिचारिका कमळ तिनगोटे अद्यापही पोलिसांच्या हाती लागलेले नाहीत. अनिलची लॅब बंद आहे. पोलीस संतोष सोनवणेच्या नातेवाइकांकडून त्याच तपास करण्याचा प्रयत्न करत आहेत.
.jpg)
