देवामामा आम्हाला रस्ता पाहिजे... शाळकरी विद्यार्थी उतरले पाण्यात!; जलसमाधी आंदोलनाने चुकला पोलिसांच्या काळजाचा ठोका!; गंगापूर तहसीलदारांच्या दुर्लक्षामुळे ग्रामस्थ संतप्त

गंगापूर (मेट्रोपोलिस पोस्ट वृत्तपत्राच्या सौजन्याने) : देवामामा आम्हाला रस्ता पाहिजे, असे आर्जव करत चिमुकले विद्यार्थी हातात रस्त्याच्या मागणीचे फलक घेऊन पाण्यात उतरल्याचे पाहून पोलिसांच्याही काळजाचा ठोका चुकला. त्यांनी ग्रामस्थांची समजूत काढली. गंगापूर तालुक्यातील जुनी झांजर्डी ते आनंदवाडी या अवघ्या दोन किलोमीटर रस्त्यासाठी हा एल्गार ग्रामस्थ आणि विद्यार्थ्यांनी आज, १७ ऑक्‍टोबरला छेडला. विशेष म्‍हणजे, आंदोलन सुरू झाल्यानंतर दीर्घकाळ उलटूनही गंगापूरच्या तहसीलदारांनी दखल घेतली नाही. यावरून प्रशासन किती कडक गेंड्याच्या कातडीचे झाले आहे, असा संताप ग्रामस्थांनी व्यक्‍त केला.

अनेक वर्षांपासून ग्रामस्थ प्रशासनाकडे पाठपुरावा करत आहेत. मात्र रस्त्याचे काम झालेले नाही. यामुळे विद्यार्थी, ग्रामस्थांचे हाल होत आहेत. वैतागलेले १०० हून अधिक ग्रामस्थ आणि विद्यार्थी सकाळी दहाला ढोरेगाव परिसरातील पाण्यात उतरले. यापूर्वी ७ ऑक्टोबरला गंगापूरच्या तहसीलदारांना ग्रामस्थांनी निवेदन दिले होते. मात्र त्‍यांनी निवेदनाकडे दुर्लक्ष केले. १० दिवस उलटूनही त्यांचा कोणताही प्रतिसाद नाही. त्यामुळे ग्रामस्थ आक्रमक झाले. रस्त्याच्या गैरसोयीमुळे विद्यार्थ्यांचे हाल होत आहेत. त्यांना शाळेत येणेजाणे कठीण झाले आहे. ग्रामस्थांचे दैनंदिन व्यवहारही विस्कळीत झाले आहेत. विद्यार्थ्यांनी दिवाळीपूर्वी रस्ता मिळणार का?, अधिकारी खोटं बोलतात, अशा घोषणांतून रोष व्यक्त केला. तातडीने रस्त्याचे काम सुरू न झाल्यास पुढील टप्प्यात ग्रामस्थ उपोषणाला बसतील आणि रास्ता रोको करतील, असा इशारा आंदोलकांनी दिला. आंदोलनात रामेश्वर गावंडे, योगेश गावंडे, भाऊ काजळे, गोपीनाथ गावंडे, राहुल काजळे, प्रणव गावंडे यांच्यासह महिला, तरुण, शाळकरी विद्यार्थी सहभागी झाले.