छत्रपती संभाजीनगर (मेट्रोपोलिस पोस्ट वृत्तसेवा) : शेतात लोंबकळत असलेल्या तारांबाबत वारंवार वीज महावितरणच्या अभियंता आणि वायरमनला कळवूनही त्यांनी दुर्लक्ष केल्याने १४ वर्षीय मुलाचा वीजप्रवाहित तारेला स्पर्श होऊन जागीच मृत्यू झाला. ही घटना वाळूज पोलीस ठाण्याच्या हद्दीतील तुर्काबाद खराडी (ता. गंगापूर) शिवारात मंगळवारी (६ जानेवारी) सकाळी ८ ला घडली. दरम्यान, या घटनेविरोधात संतप्त गावकऱ्यांनी शुक्रवारी (९ जानेवारी) तुर्काबाद खराडी येथील महावितरण कार्यालयावर मोर्चा काढला.
ओंकार कचरू जाधव (वय १४, रा. तुर्काबाद खराडी) असे मृत्यू झालेल्या मुलाचे नाव आहे. अंकुश कचरू जाधव (वय ३९, रा. तुर्काबाद खराडी) यांनी दिलेल्या तक्रारीवरून महावितरणचा अभियंता मुफीक शेख व वायरमन चंदन यांच्याविरुद्ध गुन्हा दाखल करण्यात आला आहे. दोघेही तुर्काबाद खराडीच्या महावितरण कार्यालयात कार्यरत आहेत. शेतकऱ्याने महावितरणच्या अधिकारी, कर्मचाऱ्यांना वारंवार त्यांच्या शेतात लोंबकळत असलेल्या वीज तारेबाबत अर्ज देऊन, वेळोवेळी तोंडी सांगितले होते. तरीही शेख व चंदन या दोघांनीही हलगर्जीपणा करत काम केले नाही. त्यामुळे मंगळवारी सकाळी ओंकारला तारेचा शॉक लागला आणि त्याचा मृत्यू झाला. अधिक तपास पोलीस उपनिरीक्षक आर. आर. राठोड करत आहेत.
संतप्त गावकऱ्यांचा महावितरणवर मोर्चाघटनेविरोधात संतप्त गावकऱ्यांनी तुर्काबाद खराडी येथील महावितरण कार्यालयावर मोर्चा काढला. अभियंता मुफीक शेख याच्याविरुद्ध मनुष्यवधाचा गुन्हा दाखल करून तत्काळ निलंबनाची मागणी करण्यात आली. अनेक गावांत विद्युत रोहित्राचे जीर्ण फ्युज बॉक्स, झुकलेले व मोडकळीस आलेले विद्युत पोल, लोंबकळणाऱ्या धोकादायक विद्युत तारांमुळे नागरिक, विद्यार्थी, महिला व शेतकऱ्यांचा जीव धोक्यात असल्याचे गावकऱ्यांनी सांगितले. शेतकऱ्यांच्या शेतात विनापरवानगी पोल उभारून पिकांचे नुकसान होत असल्याचेही सांगितले. सर्व विद्युत रोहित्र संच व फ्युज बॉक्स दुरुस्त करणे, मोडकळीस आलेले पोल बदलणे, लोंबकळणाऱ्या तारांना उंची देणे, शेतकऱ्यांच्या लेखी परवानगी व नुकसान भरपाईशिवाय कामे न करणे, दोषी अधिकारी व ठेकेदारांवर कठोर कारवाई करणे आदी मागण्या करण्यात आल्या.
मोर्चात योगेश पाटेकर, वैजिनाथ पाटेकर, पवन पाटेकर, दिलीपसिंग राजपूत, रतन बत्तीशे, आशिष गवळी, दतू गायकवाड, अंकुश जाधव, बाळू पाटेकर, दत्तू चौधरी, कैलास तीनगोटे, अशोक मढुरे, आकाश प्रेमभरे, सचिन जाधव, हिराभाई, गणेश काळे, खंडु राहटवाड, अफरोज शेख, गणेश जाधव, रवी पानसकर, विनोद पानकर, बाबासाहेब राहटवाड, नानासाहेब राहटवाड, नानासाहेब सामसे आदींसह मोठ्या संख्येने ग्रामस्थ उपस्थित होते. वाळूज पोलीस ठाण्याचे निरीक्षक शिवचरण पांढरे यांनी महावितरणच्या वरिष्ठ अधिकाऱ्यांशी चर्चा केली. उपअभियंता विशाल साळवे यांना पोलिसांच्या उपस्थितीत लेखी निवेदन देण्यात आले. मोर्चादरम्यान पोलीस उपनिरीक्षक रमेश राठोड, राजेश वाघ, कारभारी देवरे, पांडुरंग शेळके, अमोल गायकवाड यांनी चोख बंदोबस्त ठेवला.
.jpg)
.jpg)
