‘ज्ञानराधा’च्या ठेवीदारांवर सुरक्षारक्षकाचा गोळीबार; एक ठेवीदार जखमी, ढोरेगावच्या तिरुमला कंपनीसमोर घडली घटना

गंगापूर (सीएससीएन वृत्तसेवा) : छत्रपती संभाजीनगर- अहमदनगर मार्गावर असलेल्या ढोरेगाव (ता. गंगापूर) शिवारातील तिरुमाला कंपनीच्या प्रवेशद्वारावर सुरक्षारक्षकाने वैजापूर तालुक्यातील ज्ञानराधा पतसंस्थेच्या खातेधारकांवर छर्ऱ्याच्या रायफलमधून (डबल बोर) गोळीबार केला. यात डोक्याला छर्रे लागून एक खातेदार जखमी झाला आहे. ही घटना सोमवारी (१६ सप्टेंबर) दुपारी ३ वाजण्याच्या सुमारास घडली.

तिरुमाला कंपनी सुरू आहे की बंद हे पाहण्यासाठी खातेदार आले होते. वैजापूर तालुक्यातील शेकडो खातेधारकांनी सुरेश कुटे याच्या ज्ञानराधा मल्टिस्टेटच्या वैजापूर शाखेत लाखो रुपयांची गुंतवणूक केली आहे. मात्र, मल्टिस्टेट बंद पडल्याने या ठेवीदारांच्या तोंडचे पाणी पळाले आहे. यापैकी पाच ठेवीदार सोमवारी दुपारी तीनच्या सुमारास कुटेची तिरुमला कंपनी सुरू आहे की नाही, हे पाहायला आले होते. आम्हाला कंपनीत प्रवेश द्या, अशी मागणी ते सुरक्षारक्षकाकडे करत होते. तिथे कंपनीद्वारे नियुक्त शौर्य एजन्सीच्या योगेश बबन तनकुरे (डबल बोर परवानाधारक सेवानिवृत्त सैनिक, वय ४०, रा. आखेगाव, ता. शेवगाव, जि. अहमदनगर) या सुरक्षा रक्षकाने त्यांना विरोध केला.

ठेवीदार आणि त्याच्यात वाद होऊन ठेवीदार कंपनीत घुसत असताना तनकुरे याने त्याच्याजवळील छर्रा बंदुकीने गोळीबार केला. त्यात शिवनाथ देविदास आहेर (वय ३३, रा.नगिना पिंपळगाव, ता. वैजापूर) याच्या डोक्याला व हाताला छर्रा चाटून गेला. तो जखमी झाला. त्याच्यासोबतच्या इतर सहकाऱ्यांनी त्याला जखमी अवस्थेत गंगापूर येथील एका खासगी रुग्णालयात दाखल केले. याप्रकरणी जखमी शिवनाथ आहेर यांच्या फिर्यादीवरून कंपनीचा सुरक्षा रक्षक योगेश बबन तनकुरे याच्या विरोधात गुन्हा दाखल करण्यात आला आहे, तर सुरक्षा रक्षक तनकुरे यानेही राहुल अशोक देवरे (वय ३१, रा. लक्ष्मीनारायणनगर, वैजापूर), पुष्पेंद्र कृष्णदास बापते (४३, नवजीवन कॉलनी, वैजापूर), ज्ञानेश्वर श्रीराम गायके (३२, रा. भिवगाव, ता. वैजापूर), योगेश सुभाष गायकवाड (३५, रा. गायकवाडवाडी, वैजापूर) यांच्या विरोधात सार्वजनिक ठिकाणी शांतता भंग करणे व खासगी मालमत्तेत जबरदस्ती घुसण्याचा प्रयत्न केला, म्हणून फिर्याद दिली आहे.