छत्रपती संभाजीनगर शहरात पावसाचे तांडव : सातारा ते पडेगाव ढगफुटी!; शहरवासियांची दाणादाण

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : शुक्रवारी (१९ सप्‍टेंबर) सायंकाळी सहानंतर छत्रपती संभाजीनगरात पावसाने तांडव केले. सलग दोन तास सुसाट वारे, विजांच्या कडकडाटासह मुसळधार पावसाने हजेरी लावली. यामुळे शहरवासियांची दाणादाण उडाली. अवघ्या शहराचा वीजपुरवठा खंडित झाला. सखल भागातील ५० हून अधिक वसाहतींमध्ये घरे, दुकानांत पाणी शिरले. पडेगावमध्ये तर अक्षशः ढगफुटी झाली. पावसामुळे रस्‍त्‍यावरचे काहीच दिसेनासे झाल्याने वाहतूकही ठप्प झाली. एमजीएम वेधशाळेच्या नोंदीनुसार, पडेगावमध्ये १०५ मि. मी. पाऊस झाला असून, चिकलठाण्यात १६.६ मि.मी., एमजीएम परिसरात २४.१ व गांधेलीत २.४ मि. मी. पाऊस झाला आहे.

वीज पुरवठा ठप्प
पडेगाव ते सातारा या भागात ढगफुटीसदृश पाऊस झाल्याने अवघ्या शहराचा वीज पुरवठा खंडित झाला होता. पिसादेवीपासून तर साताऱ्यापर्यंत आणि चिकलठाण्यापासून तर पडेगावपर्यंत शहर अंधारात बुडाले. रात्री ११ पर्यंत टप्प्याटप्प्याने वीजपुरवठा सुरळीत करण्यात महावितरणला यश आले. तोपर्यंत महावितरणच्या नियंत्रण कक्ष, हेल्पलाइनवरून नागरिकांना प्रतिसाद मिळालाच नाही. यंदाच्या पावसाळ्यातील हा सर्वात मोठा पाऊस होता. गारखेडा परिसर, बीड बायपास, सातारा देवळाई, पडेगाव, हर्सूल, चिकलठाणा, सिडको, हडको, मुकुंदवाडी, जयभवानीनगर, शिवाजीनगर, उस्मानपुरा, ज्योतीनगर, जुन्या शहरातही वीजपुरवठा खंडित झाला होता. अनेक भागांत ४ ते ५ तास वीज गायब होती.

या भागांत साचले पाणी
शिवाजीनगर भुयारी मार्ग, देवळाई चौक, चेतक घोडा, प्रतापनगर, दर्गा चौकासह उड्डाणपुलाखाली, त्रिमूर्ती चौक, जयभवानी चौक, पुंडलिकनगर, सिडको उड्डाणपूल, अदालत रोड, महावीर चौक ते छावणी उड्डाणपूल, जाधववाडी, हर्सूल परिसर, टीव्ही सेंटर, आझाद चौक, सिटी चौक, एमजीएम परिसर, पडेगावमधील सखल भागांत दोन ते तीन फुटांपर्यंत पाणी साचले.

अनेकांच्या घरांत पाणी...
जिल्हा क्षयरोग कार्यालय, भावसिंगपुरा, अमीन चौक परिसर, रेल्वे गेट एमआयटी परिसरातील कमल सोसायटी, कोकणवाडीतील भगीरथ कॉलनी, क्रांतीनगरातील तन्मय फिटनेस क्लबमध्ये, विजयनगर गारखेडा परिसर, इंदिरानगरातील नागरिकांच्या घरात पाणी घुसले. त्‍यांचे कॉल अग्निशमन दलाकडे आल्याचे सांगण्यात आले. जवानांनी तिथे धाव घेऊन पंपाने पाणी उपसले.

विमानाला उशीर
पावसामुळे मुंबईहून रात्री ८:२५ वाजेच्या सुमारास शहरात येणाऱ्या विमानाला जवळपास अर्धा तास विलंब झाला. सकाळच्या सत्रातही इंडिगोचे मुंबई- छत्रपती संभाजीनगर विमान धुक्याच्या परिस्थितीमुळे धावपट्टीवर उतरले नाही. पायलटने विमान नागपूरला वळविण्याचा निर्णय घेतला. नागपूरहून सकाळी साडेनऊ वाजेच्या सुमारास हे विमान पुन्हा शहरात आले. सकाळी साडेदहा वाजेच्या सुमारास या विमानाने मुंबईसाठी उड्डाण घेतले.