छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर ग्रामीण पोलिसांच्या स्थानिक गुन्हे शाखेने नक्षत्रवाडीतून चोरीला गेलेले ट्रॅक्टर-टँकर शोधून काढत चोरट्यांच्या मुसक्या आवळल्या. पांडुरंग गोरख दसपुते व विशाल राजगुरू (दोघे रा. छत्रपती संभाजीनगर) व अजय बद्रीनाथ राऊत (रा. उटवद, ता. जि. जालना) अशी संशयितांची नावे आहेत.
चिकलठाणा पोलीस ठाण्यात १ जानेवारीला नितीन रंगनाथ मोरे (वय ३६, रा. कांचननगर नक्षत्रवाडी) यांनी त्यांचे ट्रॅक्टर व टँकर चोरीला गेल्याची तक्रार दिली होती. या गुन्ह्याचा तपास करत असताना पोलीस निरीक्षक विजयसिंह राजपूत यांना गोपनीय बातमीदारामार्फत बातमी मिळाली की, हा गुन्हा पांडुरंग दसपुते व विशाल राजगुरू यांनी त्यांच्या इतर साथीदारांसह केला आहे. राजपूत यांनी चोरट्यांचा शोध घेण्याचा आदेश सहायक पोलीस निरीक्षक पवन इंगळे, पोलीस अंमलदार विष्णू गायकवाड, अशोक वाघ, शिवानंद बनगे, अनिल काळे, महेश बिरुटे यांना दिला. त्यांनी संशयित चोरटे पांडुरंग दसपुते व विशाल राजगुरू यांना ताब्यात घेऊन कसून चौकशी केली. त्यांनी साथीदारांसह ट्रॅक्टर-टँकर चोरल्याची कबुली दिली.
त्यांनी हे ट्रॅक्टर हे उटवद (ता. जि. जालना) येथे अजय बद्रीनाथ राऊत (रा. उटवद) यास दिले आहे, तर टँकर सिध्दीविनायकनगर करमाड येथे मोकळ्या जागेत उभे केले आहे. पोलिसांनी दोन्ही ठिकाणी जाऊन ट्रॅक्टर व टँकर जप्त केले. असा एकूण ३ लाख ६६ हजार रुपयांचा मुद्देमाल जप्त केला. मुद्देमाल व चोरट्यांना चिकलठाणा पोलिसांच्या ताब्यात दिले. ही कामगिरी पोलीस अधीक्षक डॉ. विनयकुमार राठोड, अप्पर पोलीस अधीक्षक अन्नपूर्णा सिंह यांच्या मार्गदर्शनाखाली पोलीस निरीक्षक विजयसिंह राजपूत, सहायक पोलीस निरीक्षक पवन इंगळे, सुधीर मोटे, पोलीस अंमलदार विष्णू गायकवाड, अशोक वाघ, शिवानंद बनगे, अनिल काळे, महेश बिरुटे, योगेश तरमळे, संजय तांदळे यांनी केली.
